Намангандаги оддий мактаб ўқувчилари халқаро турнирда ғалаба қозонди

Наманганнинг Поп шаҳридаги оддий мактаб ўқувчилари Аstana Open халқаро турнирида ғалаба қозонди. 

Остона шаҳрида 8—11-синф ўқувчилари учун ўтказилган Аstana Open халқаро фестивалида Қозоғистон ва Ўзбекистондан жами 27 мактаб жамоалари иштирок этди. Икки кунлик фестивал доирасида “Мусиқий хамса”, “Эрудит-квартет”, “Шахсий ўйин” ва “Заковат” бўйича беллашувлар олиб борилди. Қувонарлиси фестивал доирасидаги “Заковат” ўйинида 1-ўринни Поп туманидаги 67-ИДУМнинг “Гексагон” жамоаси эгаллади.

Мазкур жамоа 2023 йили умумий ўрта таълим мактаблари ўқувчилари ўртасидаги “Заковат” турнирида ҳам 1-ўринни қўлга киритган эди. Шунингдек, “Заковат” ўйинида 3-ўринни ҳам Ўзбекистондан борган жамоа — Sehriyo School мактабининг Vorpal Swords жамоаси эгаллади.

Ўзбекистоннинг яна бир жамоаси - International Talent Academy таълим муассасасининг “Академия талантов” жамоаси “Эрудит-квартет” баҳсларида 3-ўринни қўлга киритди. Ўқувчилар “Шахсий ўйин” баҳсларида ҳам медалларни қўлга киритди. 2- ва 3- ўринлар “Академия талантов” жамоаси аъзолари — Егор Дёмин ҳамда Софя Корзикка насиб этди.

Мусобақада совриндор бўлган ҳар учала жамоа ҳам “Заковат интеллектуал клуби” ННТ томонидан ўтказиб келинадиган “Заковат” бўйича ўқувчилар лигаси, “Заковат: Школьная лига” ва бошқа бир қатор мусобақаларда мунтазам қатнашиб, юқори ўринларни эгаллаб келади.