Эрон ҳукумати 13 август куни Шероздаги Шоҳ Черах мақбарасига уюштирган ҳужум сабабли Тожикистон фуқароси Раҳматулло Наврўзовни ўлим жазосига ҳукм қилди. Бу ҳақда Anadolu хабар берди.
Ҳужумнинг яна икки нафар айбланувчиси беш йиллик қамоқ жазосига ҳукм қилинган. Эрондаги энг йирик бешта шиа зиёратгоҳидан бири бўлган Шоҳ Черахга уюштирилган ҳужум оқибатида икки киши ҳалок бўлган, етти киши яраланган.
Форс вилояти бош прокурори Саид Козим Мусавийнинг хабар беришича, Раҳматулло Наврўзов “икки марта ўлимга ҳукм қилинган”. Тергов давомида айбланувчи “Ислом давлати” террорчилик гуруҳига аъзолигини ва улар билан ҳамкорлик қилганини тан олган.
Тожикистон ҳуқуқ-тартибот идоралари ҳозирча бу фактга изоҳ бермаган. Форс вилояти расмийлари Шоҳ Черах масжидига қилинган ҳужумга “бошқа террорчиларнинг қатл этилгани учун қасос” бўлиши мумкинлигини истисно этмаяпти. Ушбу ҳужумда 13 киши ҳалок бўлган, яна 27 киши яраланганди.
Биринчи суд мажлисида Наврўзовнинг ўзи сўроққа тутилганди. У ИШИДга ижтимоий тармоқлар орқали қўшилганини айтган. Унга Туркияга боришни буюришган. Туркиядан ноқонуний равишда Эронга, сўнгра Покистонга, у ердан Афғонистонга кириб, жангарилар лагерида ҳарбий тайёргарликдан ўтган.
Наврўзовнинг сўзларига кўра, ИШИД эмиссарлари унга масжидга ўт қўйиш ва диндорларни отиб ташлашни буюрган. Оқибатда у масжидга бензин билан келган, бироқ гиламларга ўт қўйишга улгурмай қўлга олинган. У олдида бўлган автомат билан ўткинчиларга 11 марта ўқ узган. Оқибатда икки кишининг ўлимига ва яна етти кишининг яраланишига сабаб бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)