БМТ “Толибон” билан ҳамкорлик қилиш шартини маълум қилди

Бирлашган Миллатлар Ташкилоти (БМТ) “Толибон” ҳаракати билан ҳамкорлик қилиш шартларини аниқ белгилаб берди. Бу ҳақда Sputnik Афғонистон хабар берди.

БМТ Хавфсизлик кенгаши Афғонистондаги вазият бўйича ҳисоботидан сўнг, бу давлат ҳукуматида аёллар бўлмаса, “Толибон” билан глобал ҳамкорлик бўлмаслигини айтди. 

“Афғонистоннинг БМТдаги ваколатхонаси ва ‘Толибон’ билан бошқа глобал алоқаларга бу мамлакат ҳукуматида афғон аёллари бўлмаса, ишониб бўлмайди. Афғонистоннинг халқаро институтлар ва тизимларга ҳар қандай расмий реинтеграцияси афғон аёлларининг иштирокини талаб қилади.

Хотин-қизларнинг асосий ҳуқуқлари, жумладан, таълим олиш, меҳнат қилиш, жамоат ва сиёсий ҳаётда вакиллик қилиш ҳуқуқлари ҳукуматнинг асосий масъулиятининг бир қисми бўлишдан ташқари, узоқ муддатли ва иқтисодий ўсиш салоҳиятини оширишда зарурдир”, — дейилди БМТ Хавфсизлик кенгашида.

Афғонистонда аёлларга нисбатан жорий қилинган тақиқлар қуйидагилар:

• афғонистонлик аёлларнинг БМТ идораларида ишлаши;
• эркакларга аёллар учун кийим тикиш;
• аёлларнинг эркак шифокорларга бориши; 
• аёлларнинг шифохонага ёлғиз бориши;
• аёлларнинг истироҳат боғига ташриф буюриши,
• оилалар ва аёлларнинг боғлари ёки яшил ҳудудлари бўлган ресторанларга кириши,
• аёллар овози эшитилган рекламаларни эфирга узатиш тақиқланган.