“Толибон” ташқи ишлар вазири Амирхон Мутаққий Афғонистон минтақа ҳукуматларга қараганда анча инклюзив эканини айтди. Бу ҳақда у ишбилармонлар ва инвесторлар билан бўлиб ўтган учрашувда маълум қилди.
Мутаққий “Толибон” ҳаракатидан инклюзив ҳукумат ўрнатишни сўраганларга шу тариқа жавоб берди. Маҳаллий нашрлар вазирнинг жавоби Эрон ташқи ишлар вазири Ҳусайн Амирабдуллоҳианга қаратилган бўлиб, у бир неча бор Афғонистонда инклюзив ҳукумат ўрнатишга чақирганини айтмоқда.
Шунингдек, Мутаққий Афғонистон Марказий ва Жанубий Осиё ўртасидаги савдо ҳамда алоқа учун энг яқин ва яхши йўл эканини таъкидлади.
“Толибон” ташқи ишлар вазири Афғонистоннинг ўтган йили экспорти 1 миллиард 900 миллион долларга етгани, бу мамлакат савдо тарихида мисли кўрилмагани, Афғонистоннинг иқтисодий аҳволи ҳам яхши эканини қўшимча қилди.
Ваҳоланки мазкур баёнот Бутунжаҳон гуманитар ташкилоти маълумотларига зид келмоқда. Ташкилот яқинда 28,8 миллион одам омон қолиш учун инсонпарварлик ёрдамига муҳтожлигини, Афғонистондаги 3 миллиондан ортиқ болалар ҳамда 80 минг ҳомиладор ва эмизикли аёллар озуқага муҳтожлигини айтганди.
“Толибон” Афғонистон устидан назоратни тиклаганига қарийб икки йил ўтди ва ҳозирча ҳеч бир давлат бу ҳаракат режимини тан олмаган. Инсон ҳуқуқлари, хусусан, аёллар ҳуқуқларини таъминлаш, инклюзив ҳукуматни барпо этиш “Толибон”ни тан олишнинг глобал шартларидандир. Бироқ “Толибон” уларнинг ҳукумати инклюзив эканини таъкидлаб келади.
Изоҳ (0)