БМТнинг Афғонистон бўйича махсус маърузачиси Ричард Беннетт янги ҳисоботида таълимсиз қолган ўсмир қизлар орасида руҳий тушкунлик ва ўз жонига қасд қилиш фикри кўпайганини айтди. Бу ҳақда Hasht-e Subh Daily хабар берди.
Бу муаммо билан бир қаторда мажбуран турмушга бериш ва ёш болаларни сотиш ҳолатлари кўпайган. Ҳисоботда бу аслида “Толибон”нинг 2021 йил августидан бошлаб ўз жонига қасд қилиш ҳолатлари камайгани ва руҳий саломатлик яхшилангани ҳақидаги даъволарига зиддир.
“Камситувчи ва чекловчи муҳит, қўрқув муҳити ва инсон ҳуқуқлари бузилиши олдида жавобгарлик йўқлиги аёллар ва қизларнинг ҳуқуқларини рўёбга чиқаришни имконсиз қилган”, — дейилади ҳисоботда.
Таъкидланишича, “Толибон” 2021 йилнинг сентябридан 2023 йил майигача аёлларга қарши 50 дан ортиқ фармон чиқарган.
БМТ махсус маърузачисига кўра, “Толибон” фармонлари аёллар ва қизларнинг жамиятда иштирок этиш, асосий хизматлардан фойдаланиш ва пул топиш имкониятларини сезиларли даражада чеклайди.
Изоҳ (0)