Саудия Арабистонида рухсатномасиз ҳаж зиёратини амалга оширишга уринган 17 мингдан ортиқ киши ҳибсга олинди, деб хабар бермоқда Аrab News.
Саудия Хавфсизлик қўмитаси раҳбари генерал-лейтенант Муҳаммад ал-Бассамийнинг айтишича, жами 17 615 киши ҳибсга олинган. Улар орасида яшаш, меҳнат ва чегара хавфсизлиги қоидаларини бузган 9 509 киши, шунингдек, қиролликнинг турли ҳудудларида сохта ҳаж сафарини ташкиллаштиришга уринган 105 киши бор. Уларнинг барчаси прокуратура органларига топширилган.
Ал Бассамийнинг қўшимча қилишича, ҳаж рухсатномаси бўлмаган 202 695 киши Маккага кириш жойларидан қайтарилган, Макка ва муқаддас жойларга кириш учун лицензияси бўлмаган қарийб 129 минг автомобиль ҳам ортга жўнатиб юборилган.
“Ҳажга рухсати бўлмаган зиёратчиларни ташиган 33 нафар шахс қўлга олиниб, маъмурий қўмиталарга топширилди ва жазоланади”, — деди Муҳаммад Ал-Бассамий.
Ўтган ҳафта Саудия Арабистонининг Макка ва Мадина шаҳарларида йиллик ҳаж зиёрати бўлиб ўтди. Унда икки миллиондан ортиқ киши қатнашди. Бу йил, коронавирус пандемиясидан кейин биринчи марта Саудия Арабистони пандемиядан аввалги йиллардаги каби кўп одамга ҳажга рухсат берди.
Изоҳ (0)