Парижда полициячи томонидан отиб ўлдирилган 17 ёшли ўсмирнинг ўлимидан сўнг Францияни қамраб олган тартибсизликлар Швейцарияга етиб борди, деб хабар бермоқда AFP. Ижтимоий тармоқлардаги чақириқлардан сўнг 2 июлга ўтар кечаси Лозанна марказида юздан ортиқ ўсмир ва ёшлар йиғилган – улар дераза ойналарини синдириб, полициячиларга тош отган. Швейцария полицияси маълумотларига кўра, 7 киши, жумладан, 6 нафар вояга етмаганлар қўлга олинди. Жабрланганлар ҳақида хабар берилмаган.
3 июль куни Франция президенти Эммануэль Макрон Франция парламенти депутатлари ва тартибсизликлардан жабр кўрган 220 та шаҳар ва коммуна мэрлари билан учрашишни режалаштирган. Мамлакатдаги вазият туфайли у Германияга белгиланган ташрифини қолдирди.
Франциядаги намойишларга полициячи отиб ўлдирган 17 ёшли ўсмирнинг ўлими сабаб бўлди. Расмий маълумотларга кўра, йигит машинада кетаётиб, полициячининг талабига биноан тўхташдан бош тортган, шунинг учун унга қарата ўт очилган. Ҳуқуқ-тартибот идоралари воқеанинг барча ҳолатларини аниқлаш учун тергов бошлади. Ўсмирни отган полициячи ҳибсга олинган. У қасддан одам ўлдиришда айбланди.
Тартибсизликлар билан боғлиқ ҳолда кунига юзлаб кишилар ҳибсга олинди — биргина якшанбага ўтар кечаси камида 719 киши қўлга олинган. Шу билан бирга, оммавий ахборот воситалари ўлдирилган йигитнинг дафн маросими тинч ўтгани ҳақида ёзди.
Отиб ўлдирилган ўсмирнинг бувиси намойишларни тўхтатишга чақирди.
“Биз дўконлар, автобуслар ва мактабларни вайрон қилишларини хоҳламаймиз. Биз ҳамма тинчланишини истаймиз”, — деди аёл.
Франциядаги тартибсизликлар фонида барча маданий тадбирлар бекор қилинган ва жамоат транспорти тўхтатилган, намойишчиларга қарши курашга 45 минг полициячи жалб қилинган. Бироқ Парижда фавқулодда ҳолат жорий этиш режалаштирилмаган.
Изоҳ (0)