Saudiya Arabistonida ruxsatnomasiz haj ziyoratini amalga oshirishga uringan 17 mingdan ortiq kishi hibsga olindi, deb xabar bermoqda Arab News.
Saudiya Xavfsizlik qo‘mitasi rahbari general-leytenant Muhammad al-Bassamiyning aytishicha, jami 17 615 kishi hibsga olingan. Ular orasida yashash, mehnat va chegara xavfsizligi qoidalarini buzgan 9 509 kishi, shuningdek, qirollikning turli hududlarida soxta haj safarini tashkillashtirishga uringan 105 kishi bor. Ularning barchasi prokuratura organlariga topshirilgan.
Al Bassamiyning qo‘shimcha qilishicha, haj ruxsatnomasi bo‘lmagan 202 695 kishi Makkaga kirish joylaridan qaytarilgan, Makka va muqaddas joylarga kirish uchun litsenziyasi bo‘lmagan qariyb 129 ming avtomobil ham ortga jo‘natib yuborilgan.
“Hajga ruxsati bo‘lmagan ziyoratchilarni tashigan 33 nafar shaxs qo‘lga olinib, ma’muriy qo‘mitalarga topshirildi va jazolanadi”, — dedi Muhammad Al-Bassamiy.
O‘tgan hafta Saudiya Arabistonining Makka va Madina shaharlarida yillik haj ziyorati bo‘lib o‘tdi. Unda ikki milliondan ortiq kishi qatnashdi. Bu yil, koronavirus pandemiyasidan keyin birinchi marta Saudiya Arabistoni pandemiyadan avvalgi yillardagi kabi ko‘p odamga hajga ruxsat berdi.
Izoh (0)