Бухорода қизларни фоҳишалик билан шуғулланиши учун чет элга юбориб келган аёл қўлга олинди. Бу ҳақда “Марказий студия” информацион дастурида маълум қилинди.
Жабрланувчилардан бирининг сўзларига кўра, у аёлга иш қидириб юргани, эридан ажрашганини айтган. Шунда аёл фоҳишалик эвазига чипта ва виза олиб беришини билдирган. У ўзининг бир нечта шериклари билан жиноий тил бириктириб, қизларни Туркия ҳудудида шаҳвоний мақсадларда фойдаланиш учун йўллаган.
Аёл қизларга 500 доллар бериб, моддий жиҳатдан қарам қилиб қўйган, авиачипта ва бошқа сарф-харажатлар ўз ҳисобидан бўлиб, улар кейинчалик қоплаб берилиши керак эди. Қизлар Туркияга борганидан кейин фоҳишалик қилиб ишлаб бериш шарти билан уларга 5 минг доллар қарздорлик юклаб қўйган.
Олинган тезкор маълумотлар асосида Бухоро вилояти ҳуқуқни муҳофаза қилувчи орган ходимлари томонидан ушбу жиноий гуруҳ фаолияти устидан жиддий кузатув олиб борилган. Қизларни Бухоро—Истанбул йўналишидаги авиарейс орқали олиб кетишни режа қилган аёл Бухоро халқаро аэропортида қўлга олинган.
Жиноят ишлари бўйича Бухоро туман судида кўриб чиқилган суд давомида аёлга 5 йил озодликдан маҳрум қилиш жазоси тайинланди. Унинг шерикларидан бирига эса 4 йил озодликни чеклаш жазоси белгиланди.
Фоҳишаликка юбориш ҳолатлари
Апрель ойида ИИВ Тезкор-қидирув департаменти томонидан аёлларни хорижий валютада баҳолаб, интим хизматлар кўрсатиш учун шароит яратиб берган ҳамда ёш қизларни чет мамлакатларга олиб бориб, тазйиқ ва зўравонлик остида мажбуран шаҳвоний эксплуатация қилиб келган гуруҳлар фаолиятига чек қўйилганди.
Шунингдек, Тошкент вилоятида қизларни Индонезияга фоҳишаликка юбормоқчи бўлганлар қамалгани тўғрисида хабар берилганди. Шунингдек, Самарқандда 29 ёшли фуқарони Дубайга фоҳишаликка юбораётган аёл ушлангани, Интерпол одам савдоси бўйича қидирувда бўлган аёлни БААдан Ўзбекистонга депортация қилгани маълум бўлганди.
Изоҳ (0)