Шерзод Шерматов ”кўпчилик сиёсий сўз эркинлиги ва олабайроқни тарғиб қилиш каби ғарб қардриятларини қўлламайдиган ва кучли давлат назорати бўлган мамлакатларда инновация бўлмайди” деяётган ғарбликлар ва Хитойни солиштирди.

Унинг таъкидлашича, Хитойда инновациянинг ривожланиш натижалари, ушбу 2 та ғарб қадриятларини сўзсиз қабул қилиш ривожланишнинг ягона йўли эмаслигини кўрсатади. Вазир нафақат ғарб, балки бу каби шарқ давлатларининг тажрибасини ҳам ўрганиб бориш зарур бўлишини таъкидлади.

”Кўпчилик ғарб давлатларини кўрган инсон сифатида яқинда Хитойга борганимда ривожланиш ва инновация бўйича Хитой нафақат орқада эмаслиги, балки кўпчилик иқтисодий ривожланган давлатлардан анча олдинда эканлигига гувоҳ бўлдим. (Масалан, Шэньчжэнь шаҳрида кўчада юрганда АҚШга нисбатан тезюрар темир йўллар кўплиги ёки электр автомобиллар кўплигининг ўзи ҳам бунга бир мисол бўла олади).

Оддий битта Huawei компаниясида 200 минг ходимларининг ярмидан кўпи, яъни 120 минг атрофида айнан илмий ишлар билан шуғулланишаркан. Умуман илмий ходимлар сони бўйича Хитой АҚШдан биринчиликни олганига анча бўлибди, яқин орада умумий R&D'га харажат бўйича ҳам ўтиб кетади.

Ўз қадриятларимизни сақлаб қолган ҳолда иқтисодиётимизни ривожлантириш устида ҳаракат қиларканмиз, албатта нафақат ғарб, балки бу каби шарқ давлатларининг тажрибасини ҳам ўрганиб боришимиз зарур бўлади”, — дейди Шерзод Шерматов.