Тошкент шаҳрида 21 май соат 16:43 да Mercedes-Benz русумли 96-сонли йўловчи автобуси тўлиқ ёниб кетди. “Тошшаҳартрансхизмат” ҳолат юзасидан маълумот берди.
Давлат рақами 01 158 HCА бўлган автобус 2012 йил ишлаб чиқарилган бўлиб, тасарруф бошидан буён 882 589 километр масофани босиб ўтган.
Дастлабки маълумотга кўра, автобус ҳайдовчиси Б.З (1990 йилда туғилган), 96-сонли йўналишда Яшнобод тумани, “Ашхобод” истироҳат боғи чорраҳасидан ҳаракатланиб бораётган вақтда, автобуснинг электр симларида қисқа туташув юзага келиб, электр симларининг ёниши содир бўлган.
Ҳайдовчи бирламчи ёнғин ўчириш воситаси ёрдамида ёнғинни бартараф этишга уринган, аммо ёнғин кучайгани сабабли, ўчириш имкони бўлмаган. Оқибатда автобус тўлиқ ёниб кетган.
Ёнғин қутқарув бўлинмалари воқеа жойига соат 16:45 да етиб бориб, соат 16:50 да ёнғинни ўчирган. Ҳодисада жабрланганлар ва жароҳат олганлар йўқ. Ҳозирда “Тошшаҳартрансхизмат” АЖнинг Ишлаб чиқариш техник бўлими ходимлари томонидан хизмат текшируви олиб борилмоқда.
Изоҳ (0)