Тошкент вилояти ИИББ ва унинг қуйи тизим ходимлари томонидан гиёҳвандлик ҳамда кучли таъсир қилувчи психотроп ва синтетик дори воситаларининг айланмасига қарши курашиш борасида назорат-рейд тадбирлари ўтказилмоқда.
Хусусан, куни кеча ИИББ Гиёҳвандлик ва психотроп моддаларининг ноқонуний муомаласига қарши курашиш бўлими ҳамда Ўрта Чирчиқ тумани ИИБ ходимлари томонидан ўтказилган тезкор-қидирув тадбирлари натижасида, вилоят ҳудудида гиёҳвандлик воситаларини маълум жойларга яшириб кетиш орқали тарқатиб келган (“закладчик”) 19 ёшли фуқаро А.О. (коллеж талабаси) далилий ашё билан ушланган.
Тадбир давомида ушбу шахс томонидан жойларга яширилган жами 25 дона кичик ўрамларда қадоқланган “мефедрон” синтетик гиёҳвандлик воситалари холислар иштирокида ҳужжатлаштирилиб олинган.
Ҳозирда ҳолат юзасидан Жиноят кодекси 273-моддаси 5 қисми билан жиноят иши қўзғатилиб, қўшимча суриштирув ва тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)