Фарғона вилояти Бувайда туманида эркак рафиқаси ва қайнотасини пичоқлаб ўлдирди. Бу ҳақда “Миллар” информацион дастурида маълум қилинди.
Қайд этилишича, туманнинг “Жилва” МФЙда яшовчи аёл оилавий жанжаллар сабаб бир неча бор ота уйига қайтиб келган. Шунга қарамай, унинг турмуш ўртоғи қайнотасиникига келиб, уни дўппослаб кетган.
Марҳуманинг опаси айтишича, синглиси эри томонидан мунтазам калтаклаб келинган, ҳатто кўричаги ёрилиб кетганида ҳам турмуш ўртоғи шифокор чақирмаган.
Эркак хотини ва икки нафар фарзандини олиб кетиш учун келганида рад жавобини олган. Шундан сўнг у хонадонга кириб, қайнатасига пичоқ санчган. Дадасини ҳимоя қилиш учун келган қиз ҳам пичоқланган.
Ҳолат юзасидан шу куннинг ўзида Бувайда тумани прокуратураси томонидан Жиноят кодексининг 97-моддаси (қасддан одам ўлдириш) 2-қисми билан жиноят иши қўзғатилган. Гумонланувчи ушланиб, унга нисбатан қамоққа олиш эҳтиёт чораси қўлланилган.
Пичоқлаш билан якунланган оилавий жанжаллар
Март бошларида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.
Шунингдек, 2022 йилнинг декабрида Тошкент вилоятида келин оилавий келишмовчилик оқибатида қайнонасини камида 20 маротаба пичоқлаган эди. Ушбу ҳолат юз берган хонадонда қайнона-келин чиқиша олмай қолган. Пичоқланган қайнонанинг айтишича, 9 ойдан бери келини унинг гапларига кирмай, айтган ишларини қилмай келган.
Изоҳ (0)