Бухоро шаҳрида транспорт воситалари ҳаракатига халақит берган тўй кортежи автомобиллари вақтинчалик жарима майдонига жойлаштирилди. Бу ҳақда “Янги Давр” информацион дастурида маълум қилинди.
Ижтимоий тармоқларда Бухоро шаҳридаги магистрал кўчалари бўйлаб тўй кортежи тартибсиз ҳаракатлангани тасвирланган видео тарқалди. Унда Mercedes-Benz ва Gentra русумли автомобиллар йўл-ҳаракати қоидаларини бузиб, хавфли манёврларни амалга оширгани тасвирланган. Машина ичида бўлган айрим йўловчилар ҳатто танасини автомобиль салонидан чиқариб, ҳаракатланган.
Бухоро вилояти ИИБга кўра, мазкур тўй кортежида иштирок этган барча автомашиналар жарима майдонига қўйилган ва уларнинг ҳар бирига маъмурий баённома расмийлаштирилган.
2023 йилнинг февраль бошларида Қашқадарё вилояти Қарши шаҳрида 5 февраль куни тўй кортежи йўлнинг ҳар иккала қатнов қисмини тўсиб, гуруҳ бўлиб ҳаракатлангани тўғрисида хабар берилганди. Уларга нисбатан Маъмурий жавобгарлик тўғрисидаги кодекснинг тегишли моддаларига асосан, маъмурий баённома тузилиб, автомашиналар вақтинчалик сақлаш майдончасига қўйилган. 2022 йилнинг июлида эса Наманганда транспорт воситалари ҳаракатига халақит берган тўй кортежи автомобиллари жарима майдонига жойлаштирилган эди.
Изоҳ (0)