Гиёҳвандлик воситалари савдосига қарши курашиш борасида Давлат хавфсизлик хизмати ходимлари томонидан Божхона қўмитаси ва Ички ишлар органлари билан ҳамкорликда бир нечта тезкор тадбир ўтказилди.
Хусусан, 1969 йилда Бухоро вилоятида туғилган, муқаддам гиёҳвандлик воситалари билан боғлиқ жинояти учун судланган шахс Сурхондарё вилоятининг Денов шаҳрида истиқомат қилувчи 22 ёшли таниши озиқ-овқат маҳсулотлари солинган картон қути ичига яширган ҳолда, Денов—Тошкент йўналишида қатновчи машина орқали бериб юборган 300 грамм опий моддасини Чилонзор туманида қабул қилиб олган вақтида ушланган.
Шунингдек, тезкор тадбир давом эттирилиб, Денов шаҳрида яшовчи фуқаро ҳам ушланиб, унинг уйидан 500 грамм опий моддаси процессуал тартибда расмийлаштириб олинган.
Тошкент вилоятининг Бекобод шаҳрида жойлашган “Фарҳод” чегара-божхона постида ўтказилган тезкор тадбирда эса Тожикистоннинг Душанбе шаҳрида яшовчи, 41 ёшли аёл 1,21 килограмм ва унинг 19 ёшли қизи 744 грамм гашиш моддасини ўз эгнидаги кийимлари остига яшириб, божхона назоратидан ўтказишга уринганида қўлга олинган.
Тошкент шаҳрининг Олмазор туманида қайд этилган ҳолатда 30 ёшли муқаддам гиёҳвандлик воситалари билан боғлиқ жинояти учун судланган шахснинг ёнида 5 грамм, яшаш хонадонида эса 649 грамм гашиш моддаси борлиги аниқланиб, ашёвий далил сифатида расмийлаштириб олинган.
Яна бир ҳолатда Тошкент шаҳрида яшовчи, 1986, 1987 ва 1990 йилларда туғилган 3 нафар фуқаро кетаётган Lacetti русумли автотранспорт воситаси Бектемир тумани ҳудудида тўхтатилиб, кўздан кечирилган. Натижада, автомашина салони ва юкхонасида 698 дона “Тропикамид” ва 115 дона “Регапен” кучли таъсир қилувчи дори воситалари ҳамда 7 грамм “Мефедрон” синтетик наркотик моддаси борлиги аниқланиб, процессуал тартибда расмийлаштириб олинган.
Шунингдек, тезкор тадбир давом эттирилиб, автомашина эгасининг яшаш хонадонидан 497 дона “Регапен” дори воситаси ашёвий далил сифатида олинган.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)