Дунёда биринчи: Туркия жанговар дронларни олиб юрадиган кемасини ишга туширди (фото)

10 апрель куни Туркия ўз ҳарбий-денгиз флоти таркибига жанговар дронларни ташишга мўлжалланган дунёдаги биринчи авиаташувчи кема — “Anadolu” десант кемасини қабул қилди. У хусусан, Bayraktar оиласига мансуб дронларни олиб юради.

Кема Истанбулнинг Седеф кемасозлик корхонасида қурилган. Лойиҳада 130 дан ортиқ маҳаллий субпудратчилар иштирок этган, кема компонентларининг қарийб 70 фоизи маҳаллий ишлаб чиқаришга тегишли. Республика президенти Ражаб Тоййиб Эрдўғон янги ҳарбий кемани қабул қилиш маросимида иштирок этди.

“Бу кема зарурат туғилганда дунёнинг исталган бурчагида ҳарбий ва гуманитар амалиётлар ўтказиш имконини берадиган хусусиятларга эга”, — дея Эрдўғон сўзларидан иқтибос келтирди Туркия раҳбари матбуот хизмати.

Кема 2019 йилда сувга туширилган, синовлар эса 2022 йилнинг ёзида якунланган. “Anadolu” 11 та сўнгги русумдаги Bayraktar ТB3 турк ҳужумчи дронлари ёки ҳозир ишлаб чиқилаётган илғор Kizilelma реактив дронларини қабул қила олади. Шунингдек, кема палубасига 10 тагача жанговар вертолёт, ангарга эса 30 тагача дрон билан бирга 19 та вертолётни жойлаштириш мумкин.

“Anadolu” десант кемаси вазифасини ҳам бажара олади. Ишлаб чиқарувчиларнинг маълумотларига кўра, кема ўзининг логистик таъминотига эга ҳамда Эгей, Қора ва Ўрта Ер денгизлари ҳавзаларидаги потенциал можаро зонасига Туркия қуролли кучларининг камида битта баталон шахсий таркибини олиб бориши мумкин. Ҳаммаси бўлиб, кема бортига 94 та зирҳли техника, жумладан 13 танк ва 33 зирҳли транспорт воситаси ва пиёдалар учун жанговар транспорт воситаларини жойлаштириш мумкин.

Зарур бўлганда “Anadolu” табиий офатлар оқибатларини бартараф этиш ва қочқинларни эвакуация қилиш учун ишлатилиши мумкин. Кема бортида тўлиқ касалхона ва иккита операция хонаси жойлашган.

“Anadolu” 38 км/соатгача тезликка чиқа олади. Унинг максимал сиғими 27 000 тоннани ташкил қилади. Таққослаш учун: дунёдаги энг йирик Америка ҳарбий авиаташувчи кемаси “Нимиц”нинг сиғими 106 000 тоннадан ортиқ, Россия денгиз флоти авиаташувчиси “Адмирал Кузнецов”нинг сиғими эса 61 000 тонна, у 2019 йилдан бери таъмирланмоқда.