Сурхондарё вилояти Узун туманида ЙПХ инспектори пора олаётганида қўлга тушди. Бу ҳақда вилоят прокуратураси матбуот хизмати хабар берди.
Қайд этилишича, Давлат хавфсизлик хизмати Узун туманлараро бўлими ҳамда Бош прокуратура ҳузуридаги департамент, туман прокуратураси томонидан фуқаронинг мурожаати бўйича ҳамкорликда тезкор тадбир ўтказилган.
Тадбир давомида Узун туман ИИБ ЖХХ ЙҲXГ маъмурий ҳуқуқбузарлик материалларини кўриб чиқиш бўйича инспектори катта сержант Ш.А. фуқаро К.Қ.га тегишли бўлган Gentra’нинг олд ойналари махсус рухсатномасиз қорайтиргани ҳолати бўйича тегишли ҳужжатларни расмийлаштирмасдан жаримага тортмасликни ваъда қилиб, эвазига ундан 800 АҚШ доллари миқдорида пул маблағларини таъмагирлик йўли билан талаб қилгани аниқланган.
Инспектор келишилган 800 АҚШ долларини Узун тумани “Баҳористон” маҳалласи, Н.Рамозонов кўчасида жойлашган туман ИИБ ЙҲXГ маъмурий амалиёт бўлими биносида олган вақтида жиноят устида ушланган.
Мазкур ҳолат юзасидан 9 апрель куни департаментнинг Узун туман бўлими томонидан Жиноят кодексининг 210-моддаси (пора олиш) 2-қисми “в” банди билан жиноят иши қўзғатилиб, ҳозирда туман прокуратураси томонидан тергов ҳаракатлари олиб борилмоқда.
Аввалроқ Бухорода маст ҳолда машина бошқарган ҳайдовчи ЙПХ инспекторига 100 доллар пора беришга урингани тўғрисида хабар берилганди. Шунингдек, Бойсун туманида ЙПХ инспекторига пора беришга уринган қоидабузар ҳайдовчига нисбатан жиноят иши қўзғатилган эди.
Изоҳ (0)