Қашқадарё вилоятининг Қарши шаҳридаги хонадонда босқинчилик содир этиб, оила бошини ваҳшийларча ўлдирган мактаб битирувчиси 12 йил муддатга озодликдан маҳрум қилинди. Бу ҳақда Zo‘rTV каналининг ''Жиноят изи'' кўрсатувида маълум қилинди.
Аниқланишича, Қарши шаҳридаги мактаб ўқувчиси 2022 йилнинг 31 май куни “Комилон” маҳалла фуқаролар йиғинида яшовчи фуқарони болға билан аёвсиз уриб, ўлдирган. Сўнгра марҳумнинг турмуш ўртоғи ва болалари ётган хонага пичоқ олиб кириб, дастлаб марҳумнинг хотинини, сўнгра 2,5 ёшли ўғлини пичоқлайди. Она-болани ўлдирдим деб ўйлаб, марҳумнинг онаси ётган хонага киради.
Намозга уйғонган аммаси билан суҳбатлашиб, ўқишга кетаётганини айтиб, такси чақириб беришини сўрайди. Аммаси унга йўлкира бериш учун ўрнидан туриб, ўгирилганида унинг ҳам бошига уриб, ўлдиришга ҳаракат қилади. Аммаси ҳушидан кетгач, ҳовлига чиқади ва марҳум 27 ёшли эркакнинг автомобилини миниб, мактабига кетади.
Судья Ботирали Диёровнинг маълумот беришича, суд 2022 йилнинг 20 октябрь куни судланувчи ишини кўриб чиқиб, уни қасддан одам ўлдириш, икки ва ундан ортиқ шахсни қасддан ўлдиришга суиқасд қилиш ва босқинчилик жиноятларини содир этганликда айбли деб топган. Суд судланувчининг вояга етмагани, мактаб ўқувчиси экани ва қилмишидан чин кўнгилдан пушаймонлигини ҳисобга олиб, уни 12 йил муддатга озодликдан маҳрум қилган.
Эслатиб ўтамиз, аввалроқ қотилликда гумонланиб қўлга олинган ўқувчи Қарши шаҳридаги 27-мактабнинг 11-синф битирувчиси экани, жаноза пайтида қўлга олингани маълум бўлганди.
Изоҳ (1)
Qarindosh ekanmj