Туркия фуқаросига ўзини корхона эгаси дея таништириб, уни катта миқдордаги пулга чув туширган фарғоналик эркак қўлга олинди. Бу ҳақда ИИВ Киберхавфсизлик маркази хабар берди.
Қайд этилишича, туркиялик тадбиркор Р.I.га ўзини нитрат аммония селитра ишлаб чиқарувчи корхона эгаси деб таништирган М.М. исмли шахс ўғит маҳсулотларини Туркия давлатига экспорт қилиш тўғрисида келишган. У Туркия фуқаросига селитра ўғит маҳсулотлари солинган махсус қопларнинг фотосурат ва видеоларини кўрсатиб, уни алдаб, ишончига кириб, жами 887,5 минг доллар (9,6 миллиард сўм) миқдоридаги пулларни қўлга киритган ва шахсий эҳтиёжлари учун сарфлаб юборган.
Ушбу ҳолат юзасидан М.М.га нисбатан Жиноят кодексининг 168-моддаси (фирибгарлик) 4-қисми “а” банди билан жиноят иши қўзғатилган ва М.М. терговдан яширингани сабабли қидирув эълон қилинган.
ИИВ Киберхавфсизлик маркази томонидан ахборот технологиялари имкониятларидан фойдаланиб ўтказилган тадбирлар натижасида, ушбу жиноятни содир этган Фарғона вилоятида Қўқон шаҳрида яшовчи 34 ёшли М.М. Оҳангарон тумани ҳудудида яшириниб келаётгани аниқланиб, қўлга олинган.
Жиноятчи М.М. қамоққа олиниб, унга нисбатан тергов ҳаракатлари олиб борилмоқда.
Аввалроқ Андижонда яшовчи 25 яшар М.М. қозоғистонлик таниқли ишбилармоннинг 7,4 минг доллар маблағини интернет орқали фирибгарлик йўли билан ўзлаштирганди.
Изоҳ (0)