Сурхондарёда маст ҳайдовчи чора кўрмаслиги учун ЙПХ ходимига 300 доллар пора таклиф қилди

Сурхондарё вилояти Жарқўрғон туманида қоидани бузган ҳайдовчи машинасини жарима майдонига жойлаштирмаслиги учун йўл-патруль хизмати ходимига пора таклиф қилди. Бу ҳақда вилоят Йўл ҳаракати хавфсизлиги бошқармаси хабар қилди.

Қайд этилишича, 20 март куни Жарқўрғон тумани Какайди қўрғонида хизмат олиб бораётган ЙПХ инспектори Н.Э. Nexia машинасининг ҳаракати шубҳа туғдирган сабабли тўхтатган. Ҳайдовчи А.С. билан суҳбатлашиш жараёнида ундан спиртли ичимлик ҳиди келиб турганини сезган ва алкотестор мосламаси орқали текшириб кўриб, ҳайдовчининг мастлик ҳолатини аниқлаган. Инспектор ҳолат юзасидан ҳайдовчига нисбатан маъмурий баённома расмийлаштириб, транспорт воситасини вақтинчалик сақлаш учун жарима майдонига жойлаштирган.

Ҳайдовчи А.С. ЙПХ инспектори жарима майдонидан чиқиб кетаётган вақтида ўзига нисбатан чора кўрмасдан, автомашинани жарима майдонидан чиқариб беришини илтимос қилиб, эвазига 300 доллар миқдорида пора таклиф қилган. Инспектор фуқарога бу таклифи қонунда белгиланган жавобгарликка сабаб бўлишини тушунтиришига қарамай, ҳайдовчи пора таклиф қилишда давом этган.

Шундан сўнг ЙПХ ходими вилояти ИИБ бошлиғи номига фуқаро А.С.га нисбатан чора кўришни сўраб, билдирги билан мурожаат қилган. Билдиргига асосан 21 март куни соат 12:00 ларда туманнинг «Исмоилтепа» маҳалласида жойлашган жарима майдони ёнида тезкор тадбир ўтказилган, Унда фуқаро А.С. ЙПХ инспекторига 300 доллар миқдоридаги купюраларни пора тариқасида бераётган вақтида тадбир иштирокчилари томонидан ушланган ва ҳолат процессуал тартибда расмийлаштирилган.

Ҳозирда ҳолат юзасидан Жарқўрғон тумани прокуратураси томонидан терговга қадар текширув ҳаракатлари олиб борилмоқда.