Ўзбекистон ҳафта давомида ҳарорат 37 даражагача кўтарилади

Ўзбекистонда иш ҳафтасининг иккинчи ярми жуда илиқ бўлади. Бу ҳақда “Ўзгидромет” матбуот хизмати хабар берди.

Маълум қилинишича, 10 апрелдан атмосфера фронти ўтишида марказий ва шарқий ҳудудлар бўйича ёмғир ёғади, Тошкент вилоятида ва Фарғона водийси вилоятларида баъзи жойларда кучли бўлади, айрим жойларда дўл ёғиши мумкин.

Республика бўйича баъзи жойларда шамол 15-20 метр/сониягача кучаяди, баъзида эса 22-25 метр/сонияга етади. Кундузги ҳаво ҳарорати 15-20 даражани ташкил этади.

11 апрель кунидан бошлаб Ўзбекистон ҳудудига Туркманистон орқали Эрон ҳудудларидан жуда илиқ ва қуруқ ҳаво массаси кириб келади. Республика бўйича асосан ёғингарчиликсиз об-ҳаво бўлиши кутилмоқда, фақат Қорақалпоғистон Республикаси ва Ҳоразм вилоятида 14 апрелда баъзи жойларда ёмғир ёғиши, момақалдироқ бўлиши мумкин. Кундузги ҳаво ҳарорати кўтарилади ва иш ҳафтасининг охирига келиб, 29-32 даражани ташкил этади, шимолда, жанубда ва чўл ҳудудларда 35-37 даражагача бўлади.

Республика бўйича баъзи жойларда 11–14 апрель кунлари шамол тезлиги 15-20 метр/сониягача кучайиши мумкин.

Республиканинг тоғолди ва тоғли ҳудудларида 10–11 апрель кунлари вақти-вақти билан ёмғир ёғади, баъзи жойларда кучли бўлади. Баланд тоғларда (2 000 метрдан юқорида) ёмғир қорга айланиши мумкин.

10–11 апрелда тоғолди ва тоғли ҳудудларда сел-сув тошқин ҳодисалари юзага келиши мумкин. Шунингдек, ушбу кунларда Тошкент вилоятининг тоғли ҳудудларида қор кўчиши хавфи бор.

Тошкент шаҳрида эса 10 апрель куни вақти-вақти билан ёмғир ёғади, момақалдироқ бўлиши, дўл ёғиши мумкин. Шамол ғарбдан 5-10 метр/сония тезликда эсади, момақалдироқ пайтида 12-17 метр/сониягача кучайиши мумкин. 11–14 апрелда ёғингарчилик кутилмайди.

12 апрель кунидан бошлаб ҳаво жадал исий бошлайди. Душанба ва сешанба кунлари кундузги ҳаво ҳарорати 16-19 даража, жума кунига келиб, 30-32 даража атрофида бўлади.