Қашқадарё вилоятининг Деҳқонобод туманида лойиҳа қиймати 66 миллиард 706 миллион сўм бўлган сел сув омбори фойдаланишга топширилди. Бу ҳақда “Дарё”га туман ҳокимлиги ахборот хизмати хабар берди.
Маълум бўлишича, сел сув омбори очилишида вилоят ҳокими Муроджон Азимов, сектор раҳбарлари, вилоят фаоллари ва аҳоли иштирок этган.
Тадбирда маълум қилинишича, Деҳқонобод сел сув омбори 1982 йилда қуриб фойдаланишга топширилган бўлиб, лойиҳавий ҳажми 15,4 миллион метр куб сув йиғишга мўлжалланган.
Мазкур сел сув омбори узоқ йиллар давомида фойдаланилиши натижасида сув омборга лойқа ва чўкиндилар йиғилиб, фойдали сув ҳажми 12,4 миллион метр кубга камайиб, атиги 3 миллион метр кубни ташкил қилиб қолган.
“Ушбу сел сув омборининг қурилиши Деҳқонобод туманидаги энг долзарб масалалардан бири бўлиб, тумандаги 29 минг гектар аҳоли томорқа майдонлари ва 1,6 минг гектар майдонларда сув таъминоти учун жуда зарур ҳисобланган.
Шунга асосан, Вазирлар Маҳкамасининг қатор топшириқлари асосида республика бюджетининг 66 миллиард 706 миллион сўм маблағ ажратилиб, 2017—2022 йилларда сел сув омбори ҳажми 20 миллион метр кубга етказиш бўйича қурилиш ишлари олиб борилди.
2020—2022 йилларда президентнинг Қашқадарё вилоятига ташрифлари давомида ҳам аграр соҳада ушбу долзарб масала кўтарилиб, барча имкониятларни ишга солиб, ушбу сув омборни қуриш ишлари жадаллаштириш, аҳоли фаровонлиги ва озиқ-овқат хавфсизлиги таъминлаш мақсадида жорий йилда сув омборнинг қурилиш ишларини якунлаш бўйича алоҳида топшириқ берилган эди”, — дейди туман ҳокими Зоир Алиқулов.
Тадбир давомида туя ва ҳўкиз сўйилиб, аҳолига эҳсон қилинган. Кекса отахон ва онахонларга махсус рамазон туҳфаси тарқатилган.
Қўшимча қилинишича, қурилиш ишлари “Қашқадарёсувқурилишинвест” давлат муассасаси буюртмачилигида пудратчи корхона “Яккабоғ қўрғони” қурилиш инжинеринг компанияси томонидан олиб борилган.
Изоҳ (0)