Toshkentda 2-aprel kuni tushdan keyin kuzatilgan yog‘ingarchilik sabab ko‘plab ko‘cha va metro bekatlarini suv bosgani aks etgan videolar tarqaldi. Poytaxt hokimligi yomg‘ir suvlari nima sababdan ko‘chalarga toshib ketganiga izoh berdi.
Qayd etilishicha, Toshkent shahridagi lotoklarning o‘rtacha diametri 300 millimetrga teng. Ular yog‘ingarchilik suvlarini kollektorlar va kanallarga yetkazadi. 2-aprel kuni ikki soat davomida kuzatilgan kuchli yog‘ingarchilik natijasida 20 millimetr yomg‘ir yog‘gan va bu aprel oyi uchun belgilangan umumiy meʼyorning, yaʼni 60 millimetrning uchdan bir qismiga teng.
“Lotoklar bir paytning o‘zida bunday katta oqimni qabul qilishga mo‘ljallanmagani bois shahrimizdagi bir necha manzilgohlarda suv to‘planishi kuzatildi”, — deyiladi hokimlik munosabatida.
Ta’kidlanishicha, ushbu holatni tezkorlik bilan bartaraf etish maqsadida Toshkent shahar Obodonlashtirish bosh boshqarmasi va uning tuman boshqarmalari, kommunal soha tizimlari, Favqulodda vaziyatlar boshqarmasi hamda Ichki ishlar bosh boshqarmasining 500 dan ortiq xodimlari va yuzdan ortiq maxsus texnikalari jalb etilib, soat 23:00 gacha barcha manzillardagi holatlar bartaraf etilgan.
Ta’kidlash kerakki, poytaxt ko‘chalarining kuchli yog‘ingarchilik vaqtida suv ostida qolishi doimiy kuzatiladigan holat. Masalan, 2022-yil mayda kuchli yomg‘ir sabab Toshkent shahri ko‘chalarini suv bosgandi. Bu kabi holat 2020 va 2019-yillarda ham kuzatilgan.
Izoh (0)