Toshkent viloyati hokimi Zoir Mirzayev sayyor qabulida yordam so‘rab kelgan 70 yoshdan oshgan fuqaroning dardini tinglab, otasini qarovsiz qoldirgan farzandlarning borligi jamiyat uchun, masʼullar uchun uyat ekanini aytib, “bu isnod”, dedi. Bu haqda viloyat hokimining fuqarolar uchun navbatdagi sayyor qabulida ishtirok etgan “Daryo” muxbiri xabar berdi.
Maʼlum bo‘lishicha, Toshkent viloyati hokimi Zoir Mirzayevning fuqarolar uchun navbatdagi qabuli O‘rta Chirchiq tumanida bo‘lib o‘tgan.
Hokim qabulida bo‘lgan 70 yoshdan oshgan otaxon 2007-yildan beri farzandlari unga qaramayotgani sabab qariyalar uyiga joylashmoqchi ekanini, ammo joylashishda muammolarga duch kelayotganini aytib, viloyat hokimidan ko‘mak so‘radi.
Fuqaro yashovchi mahalla raisining maʼlumot berishicha, murojaatchi otaxonning 3 nafar — ikki o‘g‘il, bir qiz farzandi bo‘lib, ayni paytda ular otasini qarovsiz qoldirgani sabab, fuqaro qariyalar uyiga joylashish harakatida yuribdi.
“Bu kishi saxovat uyiga joylashmoqchi. Ammo farzandlari bunga rozilik bermayotgani uchun joylashtirolmayapmiz”, — deydi viloyat hokimining muammo yuzasidan bergan savoliga javob bergan mas’ul. Murojaatchi esa 2007-yildan beri ko‘chada qolganini aytib, “70 yoshdan oshdim, ammo 2007-yildan beri ko‘chada yuribman, hech kim qaramayapti”, — dedi.
Murojaatchi otaxon, shuningdek, o‘z vaqtida traktorchi bo‘lib ishlaganini, turmush o‘rtog‘i ham farzandlari bilan yashayotganini, unga qaramayotganini bildirdi.
.jpg)
“Traktorda yurib, bolalar tarbiyasi qolib ketgan ekan-da. O‘zbekchilikka bu to‘g‘ri kelmaydi. Ramazon oyida nimalarni gaplashyapmiz. O‘lsin bunaqa farzandlar, otani rozi qilolmagan bo‘lsa. Aslida o‘sha farzandlarni qabul qiluvchi joy bo‘lsa, o‘sha farzandlarni olib borib tashlagan bo‘lardim. Bu hammamiz uchun isnod aslida. Musulmonchilikka ham to‘g‘ri kelmaydi”, — dedi viloyat hokimi mazkur masala haqida gapirar ekan.
Hokim topshirig‘iga ko‘ra, otaxonning murojaati uning farzandlari yashovchi xonadonga borib, masʼullar tomonidan o‘rganib chiqiladigan, otaxon haqiqatan ham qarovchisiz qolgan bo‘lsa, saxovat uyiga joylashtiriladigan bo‘ldi.
Izoh (0)