Россия ҳарбийлари Севастопол қирғоқларидан тахминан 900 метр чуқурликдан АҚШнинг МQ-9 Reaper дрони қолдиқларини топди. Бу ҳақда Россия Мудофаа вазирлигига яқин манбага таяниб, ForPost хабар берди.
Маълумотларга кўра, ҳозирда Россия ҳарбий-денгиз кучлари АҚШ ҳарбий-ҳаво кучларини дрони қулаб тушган ҳудудда навбатчилик қилмоқда. МQ-9 Reaper махсус сув ости роботи ёрдамида тахминан 850-900 метр чуқурликда топилган. ForPost манбасига кўра, яқин атрофдан “Жанубий оқим” газ қувурининг чуқур сув тармоғи ўтади.
Эслатиб ўтамиз, 14 март куни Қора денгиз осмонида Россия самолётлари АҚШ дронини уриб туширгани ҳақида хабар берилди. Россия Мудофаа вазирлиги эса бу маълумотни рад этиб, ҳолат бўйича баёнот берган. АҚШ Департаменти эса Россия билан музокара олиб бориш кераклигини билдирди. АҚШ Қора денгизга қулаган дрони “бегона қўлларга тушмаслиги” учун зарур чоралар кўрганини маълум қилди.
16 март куни АҚШ ҳарбий-ҳаво кучлари қўмондонлиги Россиянинг “Су-27” самолёти Қора денгизда АҚШнинг МQ-9 дрони устидан ёнилғи тўккани акс этган видеони намойиш қилди.
Изоҳ (0)