Украина май ойида қарши ҳужумга ўтиши мумкин. Унда иккита вариант бор — Politico

АҚШ Украинага баҳорги қарши ҳужумга тайёргарлик учун ёрдам беришга эътибор қаратмоқда. Ҳужум май ойида бошланиши мумкин, деб хабар берди Politico юқори мартабали америкалик мулозимларга таяниб.

Қайд этилишича, ҳозирда Украинага Ғарбнинг юзлаб танклари ва зирҳли техникалари, снарядлар, кўприклар қуришга мўлжалланган махсус техникалар — умуман қарши ҳужум учун зарур бўлган барча нарсалар юборилмоқда. Бундан ташқари, Украина армиясининг 600 нафар ҳарбийси яқинда тезкор тиббий ёрдам кўрсатиш, ўт очиш, Америкада ишлаб чиқарилган Bradley жанговар машиналари ва Stryker зирҳли транспорт воситаларини бошқариш бўйича беш ҳафталик машғулотларни якунлади. Айни пайтда аскарларнинг иккинчи гуруҳи машғулотлардан ўтмоқда.

Шунингдек, нашрнинг таъкидлашича, ёпиқ эшиклар ортида АҚШ расмийлари Киевдан артиллерия ўқ-дориларини тежашни талаб қилмоқда, аммо амалдорлар орасида Украинага қандай жанг қилиш кераклигини уқтириш шартмас, деган фикр устунлик қилмоқда.

Шундай қилиб, қарши ҳужум май ойида бошланиши мумкин. Киев ҳали стратегия борасида бир қарорга келмаган, унда иккита вариант бор, деб ёзади газета. Биринчиси — жанубга Херсон орқали Қримга силжиш, иккинчиси — шимолий позициясидан шарққа, кейин эса Россиянинг қуруқлик йўли кўпригини кесиб ўтиб жанубга силжиш.

Америкалик амалдорлар биринчи вариант ҳақиқатдан йироқлигини айтмоқда, чунки Россия Днепр дарёсининг шарқий қирғоғида ўз мудофаасига мустаҳкам ўрнашиб олган, Украинада эса бундай турдаги десант операциясини муваффақиятли бошлаш учун керакли шахсий таркиб кучи йўқ. Иккинчи вариант эҳтимоли кўпроқ, демоқда расмийлар.

Америка урушни ўрганиш институти — ISW таҳлилчилари Россия армиясининг шарқдаги ҳужумлари Украина Қуролли кучларга қарши ҳужумни бошлаш имкониятини беради, деб ҳисобламоқда.

Шу билан бирга, Украина ҳарбийлари ҳамкорлардан ёрдам олиш ва логистикани ташкил қилиш масалаларида мамлакат ҳужум учун тайёргарлик кўриши кераклигини таъкидламоқда. 

Economist нашрининг қайд этишича, Украина кучлари ҳозирдан тайёргарликни бошлаб юборган. Буни иттифоқчилардан олиб келинган техника ҳажми, қўшинларнинг хорижда ўқитилиши ҳам кўрсатиб турибди.