Донецк вилоятининг Славянск шаҳри яқинида украиналик ҳарбийлар Хитойда ишлаб чиқарилган ва қуролланган Мugin-5 дронини уриб туширди. Бу ҳақда CNN хабар берди.
CNN маълумотларига кўра, Россия назорати остидаги ҳудудда жойлашган Украина Хавфсизлик хизмати агентлари дрон учирилгани ҳақида Славянск шаҳридаги ҳарбий қисмни огоҳлантирган. 11 март куни тунги соат 02:00 да украиналик аскарлар дрон овозини эшитган ва унинг устида милтилловчи чироқни кўрган. Ҳарбийлардан бирининг сўзларига кўра, дрон жуда паст баландликда парвоз қилган, бу эса уни АК-47 ёрдами билан уриб туширишга ёрдам берган.
Кейинчалик бу Хитойнинг шарқий қирғоғидаги Сямен порт шаҳрида ишлаб чиқарилган Мugin-5 тижорат дрони экани аниқланган. Технологик блогерларнинг фикрига кўра, у “Alibaba дронлари” номи билан танилган, чунки улар Хитойнинг веб-сайтларида, жумладан, Alibaba ва Taobao’да 15 минг долларгача нархда сотилади.
Мugin Limited CNN’га бу уларнинг шахсий дрони эканини тасдиқлаган. “Дрон Украинада фойдаланилганини маъқулламаймиз. Буни тўхтатиш учун қаттиқ ҳаракат қилмоқдамиз”, — деган Мugin Limited вакили CNN’га.
Мugin Limited 2 март куни эълон қилган баёнотида уруш пайтида ўз маҳсулотларидан фойдаланишни “қоралаши” ва уруш бошланиши билан Россия ёки Украинага маҳсулот сотишни тўхтатганини айтган.
Изоҳ (0)