Қирғизистонда Жогорку Kenesҳ депутатлари Туркиядаги зилзила қурбонларига ёрдам бериш учун икки кунлик маошларини ўтказмоқчи. Бу ҳақда 24.kg хабар берди.
Мазкур таклиф халқ депутати Акилбек Тумонбаев томонидан илгари сурилган. У Туркия ҳукумати Қирғизистонга ҳар доим ҳар соҳада ёрдам бериб келганини қайд этган.
“Улар бизни сиёсий жиҳатдан қўллаб-қувватлаб, шифохоналар қурмоқда, фуқароларимиз Туркия университетларида таҳсил олмоқда. Зилзила қурбонларига ёрдам бериш учун икки кунлик маошимизни Туркиянинг Қирғизистондаги элчихонасидаги ҳисоб рақамига ўтказишни таклиф қиламан”, — деди Акилбек Тумонбаев.
Мазкур ташаббус бошқа депутатлар томонидан ҳам қўллаб-қувватланган.
Охирги маълумотларга кўра, Туркияда 6 февраль куни содир бўлган зилзила қурбонлари сони 12 873 кишига етди, яна 63 000 га яқин одам жароҳатланган.
Изоҳ (0)