“Дарё” Туркиядаги зилзила талафотлари ҳақида мунтазам хабар бериб бормоқда. Мазкур офат тафсилотларини аниқлаштириш мақсадида бир қанча журналистлар Туркия элчихонасига борди. Туркиянинг Ўзбекистондаги Фавқулодда ва мухтор элчиси Олган Бекар журналистларга мамлакатдаги ҳолат ҳақида интервью берди.
“Ҳаммангизга маълум, Туркияда юракни ларзага солувчи зилзила рўй берди ва Ўзбекистондан ёрдам жамоаси Туркияга жўнаб кетди”, дейди элчи сўзининг аввалида.
Унинг таъкидлашича, зилзила кўлами жуда катта, жами 200 км квадрат майдонни қамраб олган. Зилзила Туркиянинг ўзида 10 та вилоятни қамраган бўлса, қўшни давлатларда ҳам инсонлар мана шу табиий офатдан азият чекмоқдалар.
— Туркияда зилзила талафотларини бартараф этиш бўйича ишлар давом этмоқда. Қутқарувчилар бинолар остида қолган одамларни ва жасадларни чиқариб олишяпти. Ўзбекистон жамоаси ҳам бу бўйича ишлаяпти, бундан барчамиз хабардор бўлиб турибмиз. Зилзиладан талафот кўрган аҳоли сони 15 млн атрофида, ҳозирда эса 100 мингга яқин қутқарувчилар жалб қилинган, уларнинг 6 минг нафари хориждан ёрдамга келганлар ҳисобланади.
“Дарё” мухбири Туркия элчисидан вайрон бўлган меҳмонхоналардаги сайёҳлар ҳолати ҳақида сўради. Бунга жавобан Олган Бекар ҳозирда ҳамма вайроналар устида 24 соат давомида қутқарув ишлари олиб борилаётгани, у ерда яшовчи сайёҳлар ҳаёти ҳақида ҳозирча маълумоти йўқлиги ва статистикани келажак кўрсатишини айтиб ўтди.
Изоҳ (0)