Пригожин “Вагнер” россиялик маҳбусларни урушга ёллашни тўхтатганини айтди
“Вагнер” хусусий ҳарбий компанияси асосчиси Евгений Пригожиннинг даъво қилишича, компания россиялик маҳбусларни урушда қатнашиш учун ёллашни тўхтатган. Бу ҳақда у журналистларнинг саволига жавобан айтди. Пригожиннинг сўзларини унинг матбуот хизмати келтирмоқда.
“Вагнер” гуруҳида маҳбусларни ёллаш бутунлай тўхтатилган. Ҳозир бизда ишлаётганларнинг олдига қўйилган барча мажбуриятлар бажарилмоқда, — деди Пригожин. У компания нима сабабдан маҳбусларни ёллашдан воз кечганини айтмади.
“Вагнер” 2022 йилнинг ёзида Россиянинг Украинага босқинида қатнашиш учун маҳбусларни ёллашни бошлаганди. АҚШ ва Буюк Британия расмийларининг декабрь—январь ойларидаги ҳисоб-китобларига кўра, гуруҳ 40 000 маҳбусни ёллашга муваффақ бўлган.
Январь ойида “Рус сидяшая” фонди раҳбари Олга Романова “Вагнер” гуруҳи 50 минг маҳбусни жалб қилган бўлиши мумкинлигини айтди. Романованинг таъкидлашича, фронтда 10 мингга яқин одам қолган, бошқалари эса ўлган, яраланган, бедарак йўқолган, ташлаб кетилган ёки асирга олинган.
Февраль ойи бошида Олга Романова Россия колониялари урушда қатнашиш учун асирларни жалб қилишда давом этаётгани ҳақида хабар берди, аммо ёллаётган одамлар “Вагнер” эмас, балки Россия Мудофаа вазирлиги вакиллари эканини айтишган.
