SpaceX Украина армиясининг Starlink интернетидан жанговар дронларни бошқаришда фойдаланишини чеклади
АҚШнинг SpaceX компанияси Украина ҳарбийларига Starlink сунъий йўлдош интернетидан дронларни бошқаришда фойдаланишни чеклаш чораларини кўрди, чунки хизмат “ҳеч қачон қурол сифатида қўлланилмаган”. Бу ҳақда SpaceX президенти ва бош директори Гвин Шотвелл матбуот анжумани чоғида маълум қилди.
Дронларни бошқариш учун интернетдан фойдаланиш SpaceX’нинг Украина ҳукумати билан тузган келишуви доирасига кирмайди, деб тушунтирди Шотвелл. Унинг таъкидлашича, шартнома гуманитар мақсадларни — шифохоналар, банклар ва жанговар ҳаракатлардан жабрланган украиналикларни кенг полосали интернет билан таъминлашга қаратилган.
“Биламизки, ҳарбийлар уларни алоқа учун ишлатишади ва бу нормал ҳолат. Аммо биз ҳеч қачон ундан тажовузкор мақсадларда фойдаланиш ниятида бўлмаганмиз”, — деди Шотвелл.
Яқинда Украинада Starlink’нинг узилиб қолиши компаниянинг хизматдан дронлар учун фойдаланишларига йўл қўймаслик ҳаракатлари билан боғлиқми, деган саволга у “буни аниқ билмаслигини” ва шунинг учун жавоб беришни истамаслигини айтди. Уруш зонасига ускунани жўнатаётганда компания ундан дронларни бошқаришда фойдаланишни таклиф қилмаганди, деди у бошқа саволга жавобан.
SpaceX Украинага Starlink терминалларини Россия босқини бошланганидан сўнг етказиб бера бошлади, украиналиклар компания томонидан қуйи Ер орбитасига чиқарилган деярли 4 минг сунъий йўлдош тармоғидан фойдаланмоқда.
Украина Мудофаа вазирлиги январь ойи охирида дрон ва Starlink терминаллари билан жиҳозланиши режалаштирилган “дунёдаги биринчи дронли зарба роталари” яратилаётгани ҳақида эълон қилганди.
