Туркия Сурияга ёрдам бериш учун чегара пунктларини очмоқчи
Туркия ташқи ишлар вазири Мевлут Чавушўғлининг маълум қилишича, Туркия Суриянинг зилзилалардан вайрон бўлган шимоли-ғарбидаги яна иккита чегара дарвозасини очишни талаб қилмоқда. Бу ҳақда Daily Sabah нашри хабар берди.
Туркия вице-президенти Фуат Октай билан ўтказилган қўшма матбуот анжуманида сўзга чиққан ташқи ишлар вазири Сурия—Туркия чегарасидаги Чилвеғозу назорат пунктининг дарвозалари аллақачон очиқ экани, аммо давом этаётган гуманитар фалокат шароитида бундан кўпроғи зарурлигини айтди.
“Бу сиёсий эмас, балки инсонпарварлик масаласи” — дея Чавушўғли Анқара Сурияга гуманитар ёрдамларнинг Туркия осмонидан ўтишини таъминлаш учун ҳам керакли кўмак кўрсатаётганини таъкидлади.
Сурия давлат матбуоти ва Сурия шимоли-ғарбида фаолият юритаётган қутқарув хизмати маълумотларига кўра, зилзилалар қурбонлари сони 3 500 нафардан ошган.
Айни пайтда Сурия Бирлашган Миллатлар Ташкилоти ва унга аъзо барча давлатларни қутқарув операциялари ҳамда тиббий хизматлар, бошпана ва озиқ-овқат билан таъминлашда кўмаклашишга чақирди.
БМТ Суриянинг шимоли-ғарбий қисмига юк етказиб беришнинг барча йўлларини ўрганаётганини маълум қилди. Ташкилот ўзининг фавқулодда фондидан Туркия ва Сурияга гуманитар ёрдам жўнатиш учун 25 миллион доллар ажратди.
БМТ матбуот котиби Стефан Дюжаррикнинг айтишича, Туркиядан Сурия шимолига олиб борувчи Баб ал-Ҳава чегара пункти йўли бузилгани сабабли мухолифат назоратидаги ҳудудларга ёрдам етказиш вақтинча тўхтатилган. Унинг сўзларига кўра, чегара пунктининг ўзи бутун қолган.
