Байден келгуси президентлик сайловига номзодини қўйиш-қўймаслиги ҳақидаги саволга жавоб берди
АҚШ президенти Жо Байден 2024 йилги президентлик сайловларида қатнашиш нияти борлигини, аммо ҳозирча якуний қарорга келмаганини маълум қилди. Бу ҳақда у PBS телеканалига берган интервьюсида айтди.
“Менда шундай (иккинчи муддатга номзод бўлиш — “Дарё” изоҳи) ният бор, лекин ҳали қатъий қарорга келганим йўқ”, — деди Байден.
Журналистларнинг ундан янги муддатда ишлашда ёши ташвишлантирмайдими, деган саволига Байден ёши ва соғлиғи унга тўсқинлик қилмаслиги ва президентлик вазифаларини бажаришга халақит бермаслигини айтди.
АҚШда 2024 йилги президентлик сайлови вақтида президент Байден 82 ёшга тўлади. Мамлакатда президентлик муддати тўрт йил давом этади.
The Wall Street Journal нашрининг ёзишича, Байденнинг маслаҳатчилари аллақачон унинг сайловолди кампаниясига тайёргарликни муҳокама қила бошлаган. Жамоа ҳозир кўриб чиқаётган мавзулар — кампания штабининг тузилиши, унинг асосий ходимлари, шунингдек, бўлажак штабнинг қаерда жойлашиши.
Шу билан бирга, Politico президент ҳали якуний қарорга келмаганини хабар қилганди. У Виржиния оролларидаги Сент-Круа шаҳрида таътилда бўлган пайтда оила аъзолари ва кичик иттифоқчилар гуруҳи билан бу масалани муҳокама қилган. Давлат раҳбарига яқин манбаларга кўра, унинг яна сайловларда иштирок этиш эҳтимоли “ортиб бормоқда”.
