Яраланган «Вагнер» жангчилари Путиннинг қизига тегишли клиникада даволанмоқда

Украинада яраланган «Вагнер» гуруҳи ёлланма жангчилари Санкт-Петербургдаги «Мой медицинский центр» хусусий клиникасида даволанмоқда, деб хабар беради Радио Свобода.

Аниқлик киритилишича, ребрендингга қадар клиника «Согаз Медицина» деб номланган — у Владимир Путиннинг дўсти Юрий Ковальчук ва президентнинг қизи Мария Воронцова билан боғлиқдир.

Бу клиникада аввалроқ Путиннинг дўстлари, Федерал қўриқлов хизмати раҳбарлари, Федерация кенгаши спикери Валентина Матвиенко ва ҳукмрон элитанинг бошқа вакиллари даволаниб чиққан.

Аввалроқ интернетда «Вагнер» асосчиси Евгений Пригожин «Петербург клиникаларидан бирида реабилитациядан ўтаётган оғир ярадор жангчиларни зиёрат қилаётгани» акс этган видео пайдо бўлганди.

2022 йил августида «СОГАЗ» суғурта гуруҳига шерик компания «Номеко» АЖ ушбу клиникалар тармоғининг янги эгасига айланган. Клиника раҳбари лавозимида Владислав Баранов қолган: сентябрда «Мой медицинский центр» МЧЖ иштирокчилари уни директорлар кенгаши раҳбари этиб сайлади.

Владислав Баранов ва «Номеко» орқали клиника Владимир Путиннинг қизи Мария Воронцовага алоқадор ҳисобланади: Баранов «Номеко» эгаларидан биридир, бу компания эса Ленинград вилоятидаги «юқори технологик кўп функционал тиббий мажмуа» қурилиши ортида турибди. Расмий ҳужжатларга кўра, Мария Воронцова «Номеко» акциядори ҳисобланади.

«СОГАЗ»га Владимир Путиннинг жияни Михаил Шеломов ҳам алоқадордир.

Мария Воронцова — болалар эндокринологи. 2011 йилда у Москва давлат университети фундаментал тиббиёт факультетини битирган. Аввалроқ у Москва давлат университети фундаментал тиббиёт факультети декани ўринбосарларидан бири этиб тайинлангани хабар берилганди.

Владимир Путиннинг иккинчи қизи Катерина Тихонова ҳам Москва давлат университети билан чамбарчас боғлиқ. У «Иннопрактика» фондига раҳбарлик қилади, МДУ Мураккаб тизимлар математик тадқиқотлари институти директори ўринбосари ва МДУ Сунъий интеллект ва интеллектуал тизимлар муаммоларини истиқболли тадқиқ қилиш институти раҳбари бўлиб ишлайди.

Мария Воронцова ва Катерина Тихонова АҚШ ва Евроиттифоқ санкцияларига учраган.

Аввалроқ ОАВларда Мария Воронцова ва Катерина Тихонова Владимир Путин билан қариндошлик алоқаларига эга бўлиши мумкинлиги ҳақида кўплаб далиллар келтирилган, улар «президентнинг эҳтимолий қизлари» деб аталган эди. Санкциялар киритилганидан кейин Кремль Воронцова ва Тихонова Путиннинг оиласи аъзолари эканини тан олди, ҳисоб.