Сан-Франсиско судида фирибгарлик бўйича миллиардер Илон Маскка қарши суд жараёни бошланди. Бу ҳақда Deutsche Welle хабар берди.
Судга даъво аризаси билан мурожаат қилганлар Tesla акциядорлари ҳисобланади. Улар Илон Маскнинг твитлари туфайли товон пули талаб қилмоқда. Миллиардер 2018 йилда Tesla акцияларини ҳар бирини 420 долларга сотиб олишни режалаштирган харидорлар топилгани ҳақида твит қолдирган. Шундан сўнг инвесторлар нархи кескин кўтарилган акцияларни сотиб олишга шошилган.
Бироқ вақт ўтгач, қимматли қоғозларнинг қиймати тушиб кетган. Натижада акциядорлар Маскнинг твитлари туфайли миллиардлаб маблағ йўқотганини даъво қилган.
«Tesla компанияси раиси ва бош директори Илон Маск ёлғон гапиргани учун биз суддамиз. Унинг ёлғонлари Глен Литтлетон каби оддий одамларнинг миллионлаб доллар йўқотишига олиб келди», — дейди Tesla акциядорларини жамоавий даъвода ҳимоя қилувчи адвокат Николас Порритт.
Бу воқеа АҚШ назорат органларининг эътиборини ҳам тортган, Илон Маск 40 миллион доллар жарима тўлаши ва Tesla раҳбари лавозимини тарк этишга рози бўлган. Маскнинг адвокатлари Сан-Франсиско ҳудудида холис кузатувчиларни жалб қилишда қийинчиликлар юзага келганини айтиб, суд жараёнини кейинга қолдиришга ҳаракат қилган, бироқ муваффақиятсизликка учраган. Суд жараёни тахминан уч ҳафта давом этиши кутилмоқда.
Аввалроқ миллиардер Илон Маск ҳужжатларни қалбакилаштиргани ва ноқонуний яшаётгани учун АҚШ фуқаролигидан маҳрум этилиши мумкинлиги хабар берилганди. Маск 1995 йилда Пенсильвания университетининг физика факультетини тамомламаган ва унинг дипломи сохта экани таъкидланганди.
Изоҳ (0)