Европа яҳудийлар конгресси Россия ташқи ишлар вазири Сергей Лавровнинг баёнотини қоралаб, «шармандали» деб атади. У аввалроқ АҚШнинг Россияга нисбатан сиёсатини Адолф Гитлернинг Холокост даврида олти миллион яҳудийлар ўлимига сабаб бўлган хатти-ҳаракатларига қиёслаганди. Конгресс вазирдан ўз гаплари учун узр сўрашни талаб қилди.
Лавров 18 январь куни АҚШнинг Украинага Россия истилосига қарши туриш учун ёрдами доирасидаги хатти-ҳаракатларини Гитлер ва Наполеоннинг ҳаракатларига ўхшатди.
«Худди Наполеон Россия империясига қарши деярли бутун Европани сафарбар қилгани, Гитлер аксарият Европа мамлакатларини сафарбар қилиб, эгаллаб олиб, бор қурол-аслаҳасини кўтартириб турғизиб қўйгани ва уларни Совет иттифоқига қарши ташлагани каби, ҳозир АҚШ НАТОга кирувчи ва Евроиттифоқ аъзоси бўлган деярли барча европаликлардан коалиция тузиб, худди шу вазифа билан — ‘Россия масаласиъни узил-кесил ҳал қилиш учун мамлакатимизга қарши уруш олиб бормоқда», — деди вазир.
Европа яҳудийлар конгресси Лавровнинг гапларида Гитлернинг «Яҳудийлар масаласининг якуний ечими»га ҳаволани кўрди. Ташкилотдагилар Россия ташқи ишлар вазирининг гапларидан «ҳайратга тушгани ва ларзага келгани»ни таъкидлади.
«Бу Холокост тарихининг энг оддий даражада нотўғри талқин қилинишидир ва биз жаноб Лавровдан узр сўраб, бу изоҳларини қайтариб олишча чақирамиз», — деди конгресс президенти Ариэл Музикант. Унинг қўшимча қилишича, Россия ташқи ишлар вазири «Холокост ва Гитлерга биринчи марта ҳавола бераётгани йўқ» ва «бунга нуқта қўйилиши керак».
Оқ уйда Лавровнинг гапларини ҳақоратли деб аташди. «Бу шунчалик бемаъники, бунга муносабат билдириш ҳам керак эмас, фақат у бизга Гитлер ва Холокост атамаларини ёпиштиришга уринган ҳақиқатда ҳақоратли хатти-ҳаракатини ҳисобга олмаганда», — деди АҚШ президенти маъмурияти ҳузуридаги Миллий хавфсизлик кенгаши координатори Жон Кирби.
Украинанинг Исроилдаги элчихонаси ҳам Лавровнинг ибораларини бемаъни деб топди: «Россия ташқи ишлар вазири Иккинчи жаҳон уруши давридаги Гитлернинг жиноятларига ва Холокостга ишора қилган ҳолда навбатдаги тутуруқсиз баёнотини берди. Лавров қанчалик кўп гапирса, дунё рашистлар нафақат жорий воқеликни, балки машҳур тарихий контекстни ҳам қанчалик бузиб кўрсатаётганини шунчалик яққол кўриб бормоқда».
2022 йил майида Сергей Лавров Медиасет телеканалига берган интервьюсида «Гитлерда яҳудий қони бўлгани», «энг ашаддий антисемитлар эса, одатда яҳудийлар» эканини айтганди. Унинг бу гаплари Украина президенти Владимир Зеленскийнинг келиб чиқиши яҳудий бўлишига қарамасдан, Украина ҳукумати, гўёки, нацистларни қўллаб-қувватлаётгани ҳақидаги контекстда янграганди.
Исроил ҳукумати Лавровни ёлғончиликда ва ирқчиликда айблаган, шунингдек, Россия элчиси Анатолий Викторовни тушунтириш бериш учун чақирган эди. Россия бош раввини Бёрл Лазар Лавровнинг гапларини «ҳайратда қолдирувчи» деб атаб, вазирга узр сўрашни таклиф қилганди.
Тахминан шу вақтда Россия Ташқи ишлар вазирлиги «Антисемитизм тўғрисида» мақола эълон қилиб, унда Исроилни Киевда «неонацистик режим»ни қўллаб-қувватлашда айблаганди. 4 май куни идора расмий вакили Мария Захарова «исроиллик ёлланма жангчилар» Украинада «‘Азов’ жангарилари билан елкама-елка» жанг қилаётганини айтди.
Охир-оқибат, Исроил маълум қилишича, Лавровнинг изоҳлари учун Россия президенти Владимир Путин кечирим сўраган.
Изоҳ (0)