Буюк Британия бош вазири Риши Сунак вазирлар, шифокорлар ва раҳбарларни коронавирус билан касалланиш ҳолатларининг кўпайгани ҳамда касалхоналар тўлиб кетгани муносабати билан шошилинч йиғилишга чақирди. Бу ҳақда АP хабар бермоқда.
Таъкидланишича, кенгаш коронавирус билан касалланиш ҳолатларининг кўпайишига оид муаммоларни ҳал қилиши керак. Бундан ташқари, Буюк Британия соғлиқни сақлаш тизими ҳозирда грипп ва бошқа мавсумий вирусли касалликларнинг ортиши, шунингдек, Brexit’дан кейин тиббиёт ходимларнинг етишмаслиги муаммоларини бошдан кечирмоқда.
Буюк Британия касалхоналаридаги минглаб ўринлар узоқ вақтли парваришга муҳтож аммо борадиган бошқа жойи йўқ одамлар билан тўлдирилган. Расмий маълумотларга кўра, сўнгги бир ҳафта ичида Англиядаги касалхоналардан чиқишга тайёр бўлган беморларнинг атиги учдан бир қисми уйга қайтган. Бунинг оқибатида тез ёрдам машиналари ва шошилинч ёрдамга муҳтож одамлар касалхоналар ташқарисида соатлаб кутиб қолмоқда.
Бундан ташқари, инфляция оқибатида айрим тиббиёт ходимлари етарлича маош олмаяпти, шу боис ҳамширалар ва тез ёрдам бригадалари иш ташлаш уюштирмоқда.
Тиббиёт касаба уюшмалари раҳбарлари 9 январь куни ҳукумат вакиллари билан учрашиб, ўз талабларини муҳокама қилиши ва бу муаммоларни иш ташлашлардан ташқари ҳал қилиш устида бош қотириши кутилмоқда. Инқироз миллий соғлиқни сақлаш хизматини қандай молиялаштириш ва бошқариш ҳақидаги мунозараларга ҳам сабаб бўлди. Ҳозирча ушбу соҳа бюджет ҳисобидан молиялаштирилади, лекин бу етарли эмаслиги айтилмоқда.
Изоҳ (0)