Чеченистондан 300 га яқин ОМОН жангчилари Украинадаги «махсус ҳарбий операция» зонасига жўнаб кетди, деб хабар берди республика раҳбари Рамзан Қодиров ўзининг Telegram-каналида.
«Бугун Россия қаҳрамони Аҳмат ҳожи Қодиров номидаги Грозний халқаро аэропортидан Чеченистон Республикаси Миллий гвардиясининг ‘АҲмат-1’ ОМОН бўлинмасидан 300 га яқин жангчи фронтда олдинги чизиқдаги биродарларига ёрдам бериш учун жўнаб кетди», — деб ёзади ҳудуд раҳбари.
Қодиров жангчиларни йўлда республика парламенти раиси Магомед Даудов, бош вазир ўринбосари Абузайд Висмуродов ва Миллий гвардия қўшинларининг Чеченистон бўйича федерал хизмати раҳбари Шарип Делимхонов кузатиб бораётганини таъкидлади. Улар «омончилар»га «ёвузликка қарши курашда муваффақият ва тез орада ғолиб бўлиб уйга қайтишни» тилаган.
Декабрь ойи охирида Қодиров Украинада «Қасос» номли алоҳида махсус ҳарбий операциясининг иккинчи босқичига тайёргарлик кўрилаётганини айтганди. Биринчи босқич октябрь ойининг охирида бўлиб ўтган. «Операциянинг иккинчи қисми шафқатсизроқ бўлади», — дейди Чеченистон раҳбари.
Қодировнинг даъво қилишича, биринчи босқичда Николаев-Кривой Рог йўналишида 657 нафар украиналик жангчи йўқ қилинган, 300 нафари яраланган, 40 та махсус ҳарбий техника ишдан чиқарилган.
Изоҳ (0)