Хитойда охирги ойларда Tesla электромобилларини сотиб олган бир неча юзлаб мижозлар мамлакатнинг турли шаҳарларидаги Tesla автосалонлари ва дўконларида норозилик намойишлари ўтказди, деб хабар бермоқда Reuters.
Намойишчилар 6 январь куни компания кутилмаганда электромобиллари нархини сўнгги уч ой ичида иккинчи марта пасайтирганига норозилик билдирган. Нархлар 2022 йилнинг сентябрига нисбатан 13-24 фоизга арзонлашган. Намойишчилар янги нархларнинг пасайиши улар 2022 йилнинг сўнгги ойларида олган автомобиллари учун ортиқча пул тўлаганидан далолат беришини таъкидламоқда.
Хитой ижтимоий тармоқларида жойлаштирилган видеоларга кўра, 7 январь куни Шанхайдаги Tesla етказиб бериш маркази олдида 200 га яқин одам тўпланган. Шунингдек, Хитойнинг марказий қисмидаги Чендудан жанубдаги Шэньчжэнгача бўлган шаҳарларда компаниянинг дўконлари ва етказиб бериш марказларида ҳам оломон норозилик намойишлари ўтказган. Гувоҳлар олган видеоларда Tesla майдонларига кўплаб полиция ходимлари келганини кўриш мумкин.
Tesla China вакилининг Reuters агентлигига маълум қилишича, компания нархлар пасайишидан олдин электромобиль олган мижозларга компенсация тўлашни режалаштирмаяпти.
Изоҳ (0)