Афғонистонда «Толибон» ҳукумати пойтахт Кобулда 180 та ободонлаштириш лойиҳасини амалга оширмоқда, деб ёзади The Washington Post.
Нашрнинг ёзишича, уларнинг умумий қиймати қарийб 90 миллион долларни ташкил этади. Лойиҳалар орасида йўллар қуриш ва уларни тартибга солиш, кераксиз биноларни бузиш кабилар ҳам бор.
Нашрнинг таъкидлашича, «Толибон» авваллари амалдорлар ва командирлар яшаган, оддий афғонларнинг қурби етмаган Шерпур туманини қайта қуришга киришган. Камбағал туман Даште Барчида ҳам иш олиб борилмоқда, у ерда асосий магистрал – Қандаҳорга олиб борувчи трассада янги йўл қурилмоқда.
5 январь куни «Толибон» Хитойнинг нефть компанияси билан мамлакат шимолидаги нефть захираларини қазиб олиш ва ўзлаштириш бўйича биринчи халқаро шартномани имзолаган эди. Бу 2021 йил августида «Толибон» ҳаракати ҳокимиятни қўлга киритганидан бери Афғонистон эришган биринчи йирик хорижий сармоявий битим бўлди.
Афғонистоннинг фойдаланилмаган ресурслари 1 триллион доллардан ошиқроқ экани тахмин қилинмоқда. Хорижий инвесторлар уларни ўрганишга қизиқиш билдирган, аммо мамлакатда ўнлаб йиллар давом этган можаролар бундай ташаббусларни тўхтатган.
Изоҳ (0)