Россия президенти Владимир Путиннинг Рождество муносабати билан ўт очишни тўхтатиш режими ҳақидаги ғояси унга нисбатан норозиликни кучайтирди ва танқидларга сабаб бўлди, деб ёзади Урушни тадқиқ қилиш институти (ISW).
Хусусан, мутахассислар қайд этишича, россиялик ҳарбий, давлат ва сиёсий арбоб Игорь Гиркин (Стрелков) Путиннинг ғоясини Россия қўшинлари «мағлубияти ва таслим бўлиши йўлидаги мардона ва қатъий қадам» деб атади.
Бошқа таниқли ҳарбий блогерлар, ISW ҳисоботида айтилишича, Кремлни уруш бошлагани учун яна бир бора танқид қилиш учун Путиннинг «сулҳ» ҳақидаги гапларидан фойдаланган.
Институт тахмин қилишича, ўт очишни тўхтатиш режимининг эълон қилингани, катта эҳтимол билан, бундан кейин ҳам ахборот маконида Путин билан ўзаро манфаатли алоқаларни сақлаб турган шахслар учун ғазаб нуқтаси бўлиб хизмат қилади.
Шу билан бирга, айримлар Путиннинг баёнотидан фойдаланиб, у диний қадриятлар ва одоб-ахлоқ ҳимоячиси, деган мазмундаги гапларни тарқатишда давом этган.
Аввалроқ Россия Мудофаа вазирлиги Украинани «Рождество сулҳи»ни бузганликда айблаганди. Украина ҳарбийлари 6 январь куни Москва вақти билан соат 12:00 дан бошлаб Донецкдаги Россия позициясини уч марта ўққа тутгани, Петровский туманига жами 155 мм калибрли ўнта снаряд учиргани айтилмоқда.
Рождество сулҳи
Россия президенти Владимир Путин 6 январь соат 12:00 дан 7 январь куни соат 24:00 га қадар Украинадаги барча тўқнашув чизиғи бўйлаб ўт очишни тўхтатишни буюрган. Мазкур қарор православларнинг черковга бориши учун қабул қилинган. Москва Киевни ҳам ўт очишни тўхтатишга чақирган.
Украина президенти Владимир Зеленский Россия Рождество байрамини ниқоб қилиб, рус ҳарбийларига жиҳозлар, ўқ-дорилар етказиб бериш, сафарбарларни позицияларга яқинлаштиришни кўзлаганини айтди. Президент офиси раҳбари маслаҳатчиси Михаил Подоляк Россия таклифини иккиюзламачилик деб атади. У сулҳга рози бўлиш учун Россия бажариши керак бўлган иккита шартни айтди.
Украина Миллий хавфсизлик ва мудофаа кенгаши котиби Алексей Данилов ҳам сулҳ бўйича ўз фикрини билдирди. У Россия билан «Рождество сулҳи» бўйича ҳеч қандай музокара олиб борилмаслиги, «тажовузкор давлат» Украина ҳудудини тарк этиши кераклигини айтди.
Изоҳ (0)