Россия Мудофаа вазирлиги Украинани «Рождество сулҳи»ни бузганликда айблади. Бу ҳақда Мудофаа вазирлиги матбуот хизмати хабар берди.
Баёнотга кўра, Россия қуролли кучлари 6 январь соат 12:00 дан 7 январь 24:00 га қадар «ўт очишни тўхтатиш режими»га риоя қилган бўлишига қарамай, «Киев рус қўшинларининг аҳоли пунктлари ва позицияларини ўққа тутишда давом этган».
Краснолиманский йўналишида Украина ҳарбийлари Россия позицияларига тўрт марта миномётдан зарба берган. Белогоровка аҳоли пункти ҳудудида яна учта ўқ отиш қайд этилган, Новопавловка аҳоли пунктидан саккизта артиллерия ўқлари отилган.
«Украина қуролли кучларининг ўққа тутиши Россия қўшинларининг жавоб ўқлари билан бостирилди», — деди Россия Мудофаа вазирлиги расмий вакили.
Украина ҳарбийлари 6 январь куни Москва вақти билан соат 12:00 дан бошлаб Донецкдаги Россия позициясини уч марта ўққа тутгани, Петровский туманига жами 155 мм калибрли ўнта снаряд учиргани айтилмоқда.
Рождество сулҳи
Россия президенти Владимир Путин 6 январь соат 12:00 дан 7 январь куни соат 24:00 га қадар Украинадаги барча тўқнашув чизиғи бўйлаб ўт очишни тўхтатишни буюрган. Мазкур қарор православларнинг черковга бориши учун қабул қилинган. Москва Киевни ҳам ўт очишни тўхтатишга чақирган.
Украина президенти Владимир Зеленский Россия Рождество байрамини ниқоб қилиб, рус ҳарбийларига жиҳозлар, ўқ-дорилар етказиб бериш, сафарбарларни позицияларга яқинлаштиришни кўзлаганини айтди. Президент офиси раҳбари маслаҳатчиси Михаил Подоляк Россия таклифини иккиюзламачилик деб атади. У сулҳга рози бўлиш учун Россия бажариши керак бўлган иккита шартни айтди.
Украина Миллий хавфсизлик ва мудофаа кенгаши котиби Алексей Данилов ҳам сулҳ бўйича ўз фикрини билдирди. У Россия билан «Рождество сулҳи» бўйича ҳеч қандай музокара олиб борилмаслиги, «тажовузкор давлат» Украина ҳудудини тарк этиши кераклигини айтди.
Мавзуга доир: Украина Мудофаа вазирлиги Россия 9 йиллик уруш давомида сулҳни неча марта бузганини маълум қилди
Изоҳ (0)