Оқ уй, кутилганидек, Киевга 3 миллиард долларлик янги ҳарбий ёрдам пакети ҳақида эълон қилди, унинг 225 миллион доллари мамлакат ҳарбий салоҳиятини узоқ муддатга мустаҳкамлаш ва Украина қуролли кучларини модернизация қилиш учун мўлжалланган. Бу ҳақда Оқ уй матбуот котиби Карин Жан-Пьер маълум қилди.
«Бугун АҚШ Украина учун 3 миллиард доллардан зиёд ҳарбий ёрдамнинг янги транши ҳақида эълон қилиб, унинг ўзини ҳимоя қилиш қобилиятини қўллаб-қувватлашга содиқлигини намойиш этади», — деди у.
Пакетга Bradley жанговар машиналари ва ўзиюрар гаубицалар киради. Оқ уйда қайд этишларича, Bradley’ни етказиб бериш учун бироз вақт керак бўлади, аммо Вашингтон буни иложи борича тезроқ амалга оширишга ҳаракат қилади. Пакет, шунингдек, АҚШнинг шарқий қанотдаги НАТО бўйича шериклари учун 682 миллион долларни ўз ичига олади, бу уларга қурол тақдим этиш учун ажратилган.
Жан-Пьер қўшимча қилиҳсича, украиналик ҳарбийларни Patriot ҳаво ҳужумига қарши мажмуалардан фойдаланишга ўргатиш ҳали бошланмаган, у учинчи мамлакатда олиб борилади.
Россия томони Ғарб мамлакатлари томонидан Украинага қурол-яроғ етказилиаётганини танқид қилади. Кремль айтишича, бундай хатти-ҳаракатлар Москвага Украинада ўз мақсадларига эришишда халал бера олмайди, балки қуролли низони янада чўзиб юборади, холос.
Аввалроқ Байден октябрь ойида бошланган 2023-молия йили учун 1,7 триллион долларлик бюджет лойиҳасини имзолаганди. Ҳужжатга кўра, АҚШ мудофаа эҳтиёжлари учун 858 миллиард доллар ажратилади, Украина ва НАТОдаги иттифоқчилар қарийб 45 миллиард доллар миқдорида фавқулодда ёрдам олади. Ушбу маблағнинг қарийб 9 миллиард доллари Украина Қуролли кучларининг турли эҳтиёжлари, жумладан, ўқув машғулотлари, қурол-яроғлар, маошлар ва моддий-техник таъминот учун йўналтирилиши режалаштирилган.
Изоҳ (0)