«Толибон» ҳаракати вакиллари шаҳзода Гарридан инсониятга қарши жиноятлари учун суд олдида жавоб беришни талаб қилди. Аввалроқ ОАВларда қиролича Елизавета II нинг невараси ёзган автобиографик китобдан парчалар эълон қилинганди. Унда Сассекс герцоги Афғонистонда хизмат ўташ чоғида 25 нафар толибни ўлдирганини тан олганди.
«Сиз ўлдирганлар шахмат доначалари бўлмаган, улар одамлар бўлган; уларнинг ҳам оилалари бўлган, унинг уйга қайтишини кутган», — деб ёзди Афғонистон ички ишлар вазирининг катта ёрдамчиси Анас Ҳаққоний Twitter’да.
Толибларнинг бошқа вакили, ташкилот сиёсий идораси раҳбари Суҳайл Шоҳин Sky News’га маълум қилишича, шаҳзода Гарри «инсониятга қарши жиноят содир этган».
«Улар (толиблар) ўз мамлакати озодлиги учун курашувчилар эди, сиз эса (НАТО, шу жумладан, Британия) истилочилар эдингиз. Улар қонуний ишни амалга оширган. Улар халқ қаҳрамонлари бўлган, сиз эса уларнинг душманлари бўлгансиз», — деди Шоҳин.
Унинг қўшимча қилишича, Сассекс герцоги инсониятга қарши жинояталр ҳақидаги иш бўйича суд томонидан сўроқ қилиниши керак. Шунингдек, у мамлакатининг халқи қироллик оиласига лаънатлар ёғдирганини айтди.
2006 йилда Гарри Сандхёрстдаги Қироллик ҳарбий академиясини тугатиб, 2008 йилда ўн ҳафта мобайнида Афғонистоннинг Ҳилманд вилоятида яширинча жанг қилган. Шунингдек, у 2012 йилнинг сентябридан 2013 йилнинг январигача ҳам Афғонистондаги жанговар операцияларда қатнашган. Ўшанда у Апаче зарбдор вертолётида туриб, исёнчиларни ўлдирганини тан олганди.
Мавзуга доир:
- Британияликлар шаҳзода Гаррини қироллик унвонидан маҳрум этишни талаб қилмоқда
- Меган Маркл ва шаҳзода Гарри ҳақидаги сериал Netflix тарихидаги энг йирик ҳужжатли дебютга айланди (видео)
- Буюк Британия қироли Чарльз III нинг кенжа ўғли Гарри бутун умри давомида бошқа исм билан чақирилганини маълум қилди
Изоҳ (0)