Суданда дунёдаги «энг кўп қидирилаётган контрабандачи» қўлга олинди

Интерпол «дунёдаги энг кўп қидирувда бўлган контрабандачи», эритреялик қочоқни Суданда қўлга олди. Бу ҳақда Al Jazeera хабар берди.

Контрабандачи Кидане Зекариас Ҳабтемариам Бирлашган Араб Амирликлари (БАА) расмийлари билан ҳамкорликда ҳибсга олинган. У Ливиядаги лагерни бошқарган контрабанда раҳбари сифатида айбланмоқда. Лагерда Европага боришга интилган юзлаб шарқий африкалик муҳожирлар ўғирланган ва зўрланган.

Эфиопия ва Нидерландиядан Интерполнинг иккита қизил билдиришномасини олган Ҳабтемариам 1 январь куни Судан полицияси томонидан БАА расмийлари билан келишилган ҳолда ҳибсга олинган. Интерпол маълумотларига кўра, 2019 йилдан бери Интерпол қидирувида бўлган эритреялик контрабандачи «муҳожирларга шафқатсиз ва зўравонлик билан муносабатда бўлгани» ортидан шуҳрат қозонган.

«Биз ҳозирда Эритрея, Эфиопия, Сомали ва Судандан минглаб муҳожирларни ноқонуний равишда Ливия орқали Европага олиб ўтаётган энг муҳим одам савдоси йўлларидан бирини ёпдик», — деди БАА ички ишлар вазирлиги расмийси Саид Абдуллоҳ ал-Сувайдий.

Эритреялик энди БААда пул ювиш айби билан судланади, шундан кейин уни экстрадиция қилиш имконияти кўриб чиқилади.

Ҳабтемариам 2020 йилда Эфиопияда ҳибсга олинган, бироқ бир йилдан кейин ҳибсдан қочиб кетган ва кейинчалик сиртдан умрбод қамоқ жазосига ҳукм қилинган. У Ливиянинг Бани Валид шаҳридаги омборларни бошқарган ва одамларни товламачилик ва қийноққа солиш билан шуғулланган.