Oq uy, kutilganidek, Kiyevga 3 milliard dollarlik yangi harbiy yordam paketi haqida e’lon qildi, uning 225 million dollari mamlakat harbiy salohiyatini uzoq muddatga mustahkamlash va Ukraina qurolli kuchlarini modernizatsiya qilish uchun mo‘ljallangan. Bu haqda Oq uy matbuot kotibi Karin Jan-Pyer ma’lum qildi.
“Bugun AQSH Ukraina uchun 3 milliard dollardan ziyod harbiy yordamning yangi transhi haqida e’lon qilib, uning o‘zini himoya qilish qobiliyatini qo‘llab-quvvatlashga sodiqligini namoyish etadi”, — dedi u.
Paketga Bradley jangovar mashinalari va o‘ziyurar gaubitsalar kiradi. Oq uyda qayd etishlaricha, Bradley’ni yetkazib berish uchun biroz vaqt kerak bo‘ladi, ammo Vashington buni iloji boricha tezroq amalga oshirishga harakat qiladi. Paket, shuningdek, AQSHning sharqiy qanotdagi NATO bo‘yicha sheriklari uchun 682 million dollarni o‘z ichiga oladi, bu ularga qurol taqdim etish uchun ajratilgan.
Jan-Pyer qo‘shimcha qilihsicha, ukrainalik harbiylarni Patriot havo hujumiga qarshi majmualardan foydalanishga o‘rgatish hali boshlanmagan, u uchinchi mamlakatda olib boriladi.
Rossiya tomoni G‘arb mamlakatlari tomonidan Ukrainaga qurol-yarog‘ yetkaziliayotganini tanqid qiladi. Kreml aytishicha, bunday xatti-harakatlar Moskvaga Ukrainada o‘z maqsadlariga erishishda xalal bera olmaydi, balki qurolli nizoni yanada cho‘zib yuboradi, xolos.
Avvalroq Bayden oktabr oyida boshlangan 2023-moliya yili uchun 1,7 trillion dollarlik budjet loyihasini imzolagandi. Hujjatga ko‘ra, AQSH mudofaa ehtiyojlari uchun 858 milliard dollar ajratiladi, Ukraina va NATOdagi ittifoqchilar qariyb 45 milliard dollar miqdorida favqulodda yordam oladi. Ushbu mablag‘ning qariyb 9 milliard dollari Ukraina Qurolli kuchlarining turli ehtiyojlari, jumladan, o‘quv mashg‘ulotlari, qurol-yarog‘lar, maoshlar va moddiy-texnik ta’minot uchun yo‘naltirilishi rejalashtirilgan.
Izoh (0)