Столтенберг қурол тинчликка олиб борувчи йўл эканини айтди

НАТО бош котиби Йенс Столтенберг Украинага қурол-яроғ етказиб берилиши мамлакатда низо тугатилиб, тинчлик ўрнатилишига олиб келишини айтди. Бу ҳақда у Норвегия корхоналари конфедерациясининг йиллик анжуманида маълум қилди.

«Агар биз музокаралар орқали тинч йўл билан ечимга эришиб, Украина Европадаги мустақил демократик мамлакат сифатида сақланиб қолишини истасак, бунга етишишнинг энг тезкор усули — Украинани қўллаб-қувватлаш. Қурол — бу, моҳиятан, тинчликка олиб борувчи йўл», — деди Столтенберг.

Унинг аниқлик киритишича, «Москвадаги режим бошқача Европани кўришни хоҳлаяпти» — Россия қўшни мамлакатларни назорат қилишга интилмоқда ва «демократия ва эркинликда таҳдидни кўрмоқда», бу эса давлатни Ғарбнинг доимий рақибига айлантирмоқда. «Шундай экан, ҳатто бу уруш тугаса ҳам, бизнинг Россия билан муносабатларимиздаги муаммолар қолади», — деди Столтенберг.

Россия Хавфсизлик кенгаши раиси ўринбосари Дмитрий Медведев Столтенбергнинг баёнотига британиялик ёзувчи Жорж Оруэллнинг «1984» антиутопик романидан иқтибос келтириш орқали муносабат билдирди. «Шу аҳволгача етиб келдик! Столтенберг қурол — моҳиятан тинчликка йўл, деди. Ахир ‘ўтмиш ўчириб ташланди, ўчирилган нарсалар унутилди, ёлғон эса ҳақиқатга айланди’», — деб ёзди Медведев ўз Twitter’ида.

Россия томони Ғарб мамлакатлари томонидан Украинага қурол-яроғ етказилиаётганини танқид қилади. Кремль айтишича, бундай хатти-ҳаракатлар Москвага Украинада ўз мақсадларига эришишда халал бера олмайди, балки қуролли низони янада чўзиб юборади, холос.

Эслатиб ўтамиз, бугун, 6 январь куни АҚШ Украинага янги ёрдам пакети ҳақида расман эълон қилиши кутилмоқда. Ҳабрий кўмак ҳажми жами 2,85 миллиард долларга тенг бўлади. АП қайд этишича, ушбу ёрдам пакети АҚШ шу пайтгача Киевга тақдим этганлари ичида энг йириги бўлади. Америка ҳукумати уни баҳор бошигача етказиб бермоқчи, чунки ўша пайтда жанговар ҳаракатлар яна фаол босқичга ўтиши кутилмоқда.