Россия ва Беларусь минтақавий қўшинлар гуруҳини кучайтиришда давом этмоқда, Беларусга Россиядан янги кучлар ва ҳарбий техника етиб келмоқда, дея маълум қилди республика Мудофаа вазирлиги.
«Бугунги кунда, юзага келаётган вазиятдан келиб чиқиб, бу жараён босқичма-босқич амалга оширилмоқда», — дейишди Минскдагилар.
Етиб келаётган Россия ҳарбийлари иштирокида Беларусь полигонларида жанговар мослашув ташкил этилмоқда. «Бундан ташқари, Беларусь Республикаси ва Россия Федерацияси Қуролли кучлари авиация бўлинмалари жанговар тайёргарлик даражасини ошириш мақсадида қўшма парвоз-тактик ўқув машқларини ўтказиш режалаштирлмоқда», — дейилади хабарда.
Аввалроқ Беларуснинг Украина билан чегарасида Россия 10 мингга яқин ҳарбий йиғгани, Беларусь ҳар қандай вақтда Россияга Украинага шимолдан ҳужум қилиш имкониятини беришга тайёрлиги маълум қилинганди.
Россия ва Беларусь Иттифоқ давлати 2000 йил январидан буён мавжуд бўлиб келмоқда. Иттифоқ иштирокчилари умумий парламент ва конституция, ягона валюта яратишни муҳокама қилган, аммо бундай битимни қабул қилмаган. 2019 йилда Россия ташаббуси билан музокаралар қайта бошланди, 2021 йилда эса томонлар Россия ва Беларуснинг интеграциялашувига қаратилган 28 та иттифоқ дастурларни келишиб олди.
10 октябрь куни Беларусь президенти Александр Лукашенко россиялик ҳамкасби Владимир Путин билан «Иттифоқ давлати ғарбий чегараларидаги кескинлик сабабли» минтақавий қўшинлар гуруҳини кучайтириш ҳақида келишиб олганини маълум қилди.
15 октябрь куни эса минтақавий қўшин гуруҳларининг россиялик ҳарбийлардан иборат дастлабки эшелонлари Беларусга етиб келди. Кейинроқ эса тўққиз мингга яқин Россия ҳарбийлари қўшма қўшинлар гуруҳини жойлаштириш доирасида Беларусга етиб келиши маълум қилинди.
Изоҳ (0)