5 январь куни АҚШ конгрессменларининг спикерни сайлаш бўйича 11-уриниши ҳам муваффақиятсиз тугади ва бу 1923 йилдаги рекордни янгилади. Ўшанда спикер 9-уринишда сайланганди, деб хабар беради CNN.
Республикачилар партияси етакчиси ва асосий номзод Кевин Маккарти унинг номзодига партиядошларидан баъзилари қарши чиққани учун яна сайланмади.
Конгрессменлар кетма-кет уч кун овоз берди ва ғолиб аниқланмагунча номзодларни кўрсатишда давом этмоқчи.
Айни пайтда 6 январь тушгача танаффус эълон қилинган. Тахминларга кўра, бу вақтда республикачилар спикерни узил-кесил сайлаш ва АҚШ Вакиллар палатасининг тўхтаб қолган ишини давом эттириш учун партия ичида муросали ечим топишга ҳаракат қилади.
1923 йилда ҳам республикачилар биринчи уринишда Вакиллар палатаси спикерини сайлай олмаган. Ўшанда конгрессмен Фредерик Жиллеттни сайлаш учун тўққизта раунд керак бўлган. Ундан аввал 1859 йилда сиёсатчилар Нью-Жерси штатидан республикачи депутат Уильям Пеннингтон ғалаба қозонгунга қадар 44 марта овоз берган.
2022 йил ноябрь ойида АҚШда оралиқ сайловлар бўлиб ўтганди, унинг натижасида республикачилар Вакиллар палатасида 218 та ўринни эгаллаб, уни назорат қила бошлади. Шундан сўнг Нэнси Пелосининг ўрнига янги спикер танлаш зарурати юзага келди, чунки Пелоси демократлар вакили.
Республикачилар партияси эндиликда АҚШ президенти Жо Байден маъмуриятининг кун тартибига таъсир ўтказиши мумкин бўлади. Олдинги икки йилда Конгресснинг юқори ва қуйи палаталарини назорат қилган демократлар республикачиларнинг розилигисиз ҳам исталган қонун лойиҳасини қабул қила олган.
Изоҳ (0)