Curiosity марсоходи томонидан Марсни тадқиқ қилиш билан ўтган ўн йил мобайнида тўпланган архив маълумотлар таҳлил қилиниши натижасида Қизил сайёрада оммавий опал конлари борлиги маълум бўлди. Бу ҳақда 3DNews хабар бермоқда.
Бўлғуси «мустамлакачилар» учун опал заргарлик безаклари сифатида эмас, балки сув манбаи сифатида қизиқдир. Бу Марсдаги бўлғуси база тақдири учун муҳим кашфиёт, дейилади хабарда.
Очиғини айтганда, Марсда опал конлари мавжудлиги ҳақида 2008 йилдаёқ Mars Reconnaissance Orbiter орбитал қурилмаси ёрдамида қўлга киритилган ахборотдан маълум бўлган эди. Зонд Қизил сайёранинг баъзи минтақаларида катта оқиш доғларни аниқлаган, улар гидратация қилинган (сув молекулалари билан бириккан) кремний диоксиди (кремнезём) чўкиндилари деб тахмин қилинганди. Кремний диоксиди гидратининг ўзи опал бўлиб, кремнезёмга бой тоғ жинсларининг сув таъсирида нураши жараёнида ҳосил бўлади. Эритма ёриқларга ва кавакларга кириб, у ерда қотади ва миллионлаб йиллар давомида қимматбаҳо минералга айланади.
Опалдаги сув кристалл тузилма билан боғланмайди ҳамда минерални майдалаш ва қиздириш чоғида қайтадан ажралиб чиқиши мумкин. Curiosity маълумотлари таҳлили кўрсатишича, узунлиги 1 метр, чуқурлиги 30 сантиметр бўлган конда 5,7 литргача сув бўлиши мумкин, бундай конларга эса марсоход олимлар кутганидан кўра анча кўпроқ дуч келган. Бу Марсни ўзлаштириш бўйича режаларни амалга ошириш учун яхши янгилик, дейилади хабарда.
Аввалроқ NASA олимлари Марсда энергия манбайи сифатида фойдаланишга етарли шамол бўлиши мумкинлигини аниқлаган эди.
Изоҳ (0)